Country Music Hall of Fame 2024-a lak luh turah Toby Keith a tel

Country Music Association (CMA) chuan Thawhṭanni khan Country Music Hall of Fame 2024-a lak luh tur mi pathum an puang a, an zingah hian February 5-a cancer avanga boral, Toby Keith pawh a tel.

Toby Keith bakah Hall of Fame-a lak luh turte hi John Anderson leh guitarist James Burton te an ni.

CMA CEO Trahern chuan Hall of Fame-a lak luh tura vote lak hi Keith thih hma, February 2 khan tihfel vek a ni tawh tih a sawi. Keith hi kum 2015 khan Nashville Songwriters Hall of Fame leh 2021-ah all-genre Songwriters Hall of Fame-ah lak luh a lo ni tawh a, 2022 khan BMI Icon-ah puan a ni bawk.

James Burton hi recording/touring musician caterogy aṭanga thlan a ni a, kum 2001-ah Rock and Roll Hall of Fame leh, 2007-ah Musicians Hall of Fame-ah lak luh a lo ni ve tawh bawk. Anderson hi veterans-era category aṭanga thlan a ni ve thung.

Country Hall of Fame-a lak luh turte hi CMA Hall of Fame Panels of Elector-in an thlang ṭhin a, mi 155 lak luh an ni tawh. Kumina thlan mi pathumte hi October thlaah lak luh an ni ang.