Beyonce album cover-in inhnialna chawk chhuak

Beyonce Knowles country album thar, 'Cowboy Carter' cover-a American flag a keng lai a dah chuan America mipui zingah inhnialna a chawk chhuak.

Album cover a tihchhuah hnuah, social media user-te'n an sawi zui nasa hle a, ṭhenkhat chuan ram hmangaihtu nia inlantir duh avanga American flag kengah an puh a, a duh thawh deuhte phei chuan 'Black American flag vai zawk rawh se' ti tein an sawi. Hetih lai hian ṭhenkhat chuan Queen Bey hi an lo chhan ve thung a, album cover chuan awmze pawimawh tak a nei a ni tiin, Black American-te thil lo din tawhte a rawn pholang leh a ni, an ti. Ṭhenkhat erawh chuan ram kaihhnawih thil nena ngaih pawlh chi a ni lo a, Beyonce chu Rodeo Queen anga incheiin, Rodeo Queen chuan hnehna an chan hnuah American flag an keng zel a ni, an ti ve bawk. 'Cowboy Carter' hi March 29 hian tihchhuah a tum a, a studio album pariatna tur a ni. A hma pawhin country album a siam tur hi sawiseltu eng emaw zat an lo awm tawh bawk.