Eminem, 50 Cent leh Snoop Dogg-te'n Dr Dre ṭawiawm

Music legend, Dr Dre chu March 19 khan Hollywood Walk of Fame-ah star pek a ni. He hunah hian amah ṭawiawmtu zingah a thawhpui leh ṭhian ṭha; Eminem, 50 Cent leh Snoop Dogg te pawh an tel.

Dr Dre chuan star pek a ni chu a lawm thu sawiin, "Kan tan engkim a ni. Ka thi thei tawh dawn lo a, hetah hian ka awm reng tawh dawn a ni," tiin a star chu a ngaihlu tak zet tih a sawi. Kum thum liam ta khan Dr Dre hi brain aneurysm avangin dinhmun ṭha lo takah a awm hman a, "Khatiang dinhmun ka tawn hnua Walk of Fame star han neih chu a ropuiin a hlu hle a ni," a ti. A hriselna dinhmunin tun hma lam pha lo mah se, chawlh mai a tum lo tih a sawi a, music ṭha tak tak siam zel a la tum tih a sawi bawk.