‘Taylor Swift: The Eras Tour’ concert film-in record a siam

Tunlai zaithiam boruak nei lian ber, Taylor Swift chuan Eras Tour hmangin music industry lamah record a siam fo a, hei chauh ni loin a concert film, Taylor Swift: The Eras Tour (Taylor’s Version) pawhin record a rawn siam ve leh ta.

Taylor Swift: The Eras Tour (Taylor’s Version) hian tlangzarh a nih aṭanga ni thum chhungin Disney+ ah view maktaduai 4.6 zet a nei hman a, music film zingah view nei ngah chak ber record a siam. View zat hi darkar mtd. 16.2 a tling a ni. 'The Eras Tour' film hi Disney+ ah kar liam ta Ningani khan pek chhuah a ni a, expanded version niin bonus song panga dah belh a ni. Chungte chu 'Cardigan' bakah, acoustic song pali - 'Death by a Thousand Cuts', 'Maroon', 'You Are in Love' leh 'I Can See You' te a ni. He film hi nikum August thlaa Los Angeles-a Eras tour show ṭum thum a neihnate an ni. “Taylor Swift: The Eras Tour” film hi nikum October 13 khan tlangzarh a ni a, box office lamah a che ṭha hle a, USD mtd. 261.7 la lut tawhin, concert film zingah sum la lut tam ber a ni tawh a ni.