Fashion Fusion Fashion Fiesta

TV lama tihchhuah ni dawn tho mah se, Vakiria Fashion Fusion chungchang han thailan loh chu a uiawm a, he show a hlawhtlin theih nana zirlaiten thi leh thau pawlha an hnathawhte hi fak phu leh chawimawi phu a ni a, tun ṭumah pawh hian thai lan loh theih loh niin ka hria.

Nula nalh tak tak hleitling zen zawn tak mai feet 5 leh inchi 5 aia hniam lo ṭhah ten zirlaite thawmhnaw, duh tawk tak maia an han inthehṭhilpui mai chu hmuhnawm tham tak a ni. Model 15 in Mualpui Multipurpose Hall-ah ni 12 April zan boruak thiang tak hnuaiah Vakiria zirlai 26-te thawmhnaw design mawi tak tak chu inbelin show hmuhnawm tak kan thlir ho a, a hneawm lohin chhimtu mipuiten an kham lo hle. Show hi zan dar 8 a ṭan niin, zai leh lemchan mai loh pawh zei em em mai, Feli Thangluah chuan Show host-in mipui hmaah introduction te rawn pein Vakiria design kawrfual dum ngal chen, embroidery works nalh tak a inbel a ni.

Chhimtu mipui lam pawh hmuh an nuamin thawhnaw design mak leh dangdai a leng bawk a, nalh tak tak hmuh tur a awm nual mai; kan chhe lo tlang a ni ber mai. Neitu lam Sangzeli Hmar pawh top bell sleeve dum nalh tak inbelin midang tih loh dan deuhin boot cut kekawr fual leh pumps nen, kum dang zawng aiin a nalh. Te-i, Vakiria head designer pawh kumdanga a kawrfual hak dan ṭhin lo ang deuin blazers embroidery works nalh tak mai a rawn inbel bawk. Paris leh New York Fashion week te ang deuhin thawmhnaw dum kan hmu hnem hle a, mit la tak tak ṭhenkhat zinga ka mit tlung zual te, Mawitei Vakiria Crew zinga lawm hlawh tak mai, kawr senlar vat mai embroidery works gold nena inpawlh a rawn inbel chu a mimal style piah lam anih avangin a nalh dangdai hle a, he kawr ṭhatna em em chu Chawlhni leh hetiang puipunnaah kekawr nena hak kawp theih a nihna te pawh hi a ni ang e. Sawmtei, cape dress senlar nalh tak mai leh pawnfen fual pawl a hak chu mimal taka hemi zan kalkhawm zinga ka mit la ber a ni awm e. A nalh ber ka ti lo amaherawhchu, a inhmeh tur a hre ber ka ti ve tlat. Thiangi erawh mi tih loh dan deuhin crop senlar leh a mil tur kekawr senlar nen simple deuh siin, a rawng rawn lar tho si hian a tinalhin show-a inbel atana mawi tak a ni ve reng.

Zirlai zingah Zualtei durtlang long coat cutwork tel senduk kak mai, a thawmhnaw design ang chiah chiah a rawn duan a rawn inbel chu mit a lain, a mawi dangdai hle. Mafaki, awards la zinga mi, simple tak mai nude color dress a rawn inbel chu classroom-a a inchei dan nen a danglam deuh a ni ang e, kan hai ṭhelh a lawm! A sam thlah mawi tak nen, vacancy erawh a awm tawh lem lo. Kitty pawh beisei loh tak maiin crop dum leh denim pants nen, a inhmeh phian, show atana rei tak tak inbuatsaih avanga pawr fep tawh. Awardee zinga mi tho most creative latu Partei top cut simple deuh, a dum a rawn inbel leh denim kekawr leh boots chu a inhmeh reuh hle bawk. Fusion 2016 show-a Queen latu Mimi, Lunglei erawh a hmel nu hnap nena inhmeh tak maiin ming coat simple tak, aqua blue lam rawngkai rawn inbelin midi skirt nen a simple nalh riau a. Zirlai zinga mi BZI abstract print coat simple tak mai hnuaia senno dal da riai a inbel chu a dangdai phian a, a mei pakhat niawma mawi a
ṭhiannu, a ṭhutpui ṭhin ni bawk OPI erawh formal dress, a pawl nalh tak mai, a collection inspired-tu Kate Middleton iangin a dak zarh mai.

Heng incheina nalh tak tak piah lama ka sawi hmaih phal loh, March thla tluana an inbuatsaihna kal chho, Camera crew te an fakawm. Henry De Corn, Facebook khawih ṭhin ho chuan kan hmelhriat vek awm e, a thiamzia chu sawi duah ngai lo nise, a mimal taka a tuina leh thawhrimna a ngaihsan awm. Ela Khiangte hi sawi tam vak lo a ti deuh tawrh mai, thawhpui nuam tak a ni bawk. David Ruata (Lada) aka Jonathan Davis,
ṭawng tlem em em mai, nui suk duh chauh, ngawi renga a hna tlin em em mai te, an sulhnu Zoram mipui ten kan hmu, an hming hmera thailan ve ka chak hrim hrim. Ṭhianpa duh tak Jayvee Jongte, hniam te aṭanga indin chhoa vawiina Zofatena kan hmelhriat tak, a sulhnu model te hmelah kan hmu, a kutkawih a nalhin a hnum, a thiam chu thuhran a profe em avangin a uluk lo chuang lo, zan rei tak tak shooting-ah min awmpuiin, a zirlaite leh a puitute show tihlawhtlingtu pakhat an ni. Heng show felfai taka min manage-sakṭhintu, Fela Vakiria management-a kan puipa a fakawm, a hah, a thiam, kan ṭangkai pui hle.

Model zingah Emily leh Nunui Rualhleng an rim fal, an nalh, thu an awih bawk. Miriami a taksa a mawi ngaiin a la mawi, Zamzami nui hmel pawh kan hmu tun ṭum chu. Mamuani a vul ngaiin a la vul, zei em em, Kimkimi a la zei tluang zel, Leni a harhvang ṭhain a bawp tlawn sei tak mai hi international lamah pawh a zahpuiawm miah lo ang. Nunui Sailo a duhawmna a bo lo a, Esther-i a hmelṭhat ngaiin a la ṭha. Mi thar Debbie a vawi khatna tih in hre miah lo ang. Hleitling ṭha tak mai Rody hi kumin chu kan chang ve ta. Naupang viau e ti loa phai lama thawn thlak chakawm em em Boihboihi a pianthiamzia sawiin a siak lo a, Lalrohlui hi a pian mawlh mai hi, Christina a pa viau thiam a, chutiang bawk chuan nu hnapa awmdan a theihnghilh chuang miah lo. Miss Mizoram pawh a sam thar nen a nalh thlawt. Model te kan chhuang, a hmun cheina mawi tak piah lama Mizorama a vawikhatna atan Ramp U shape kan hmu.Chanchinbu chhuak hmasa ten best craft endorsement latu Siamsiami khua leh tui an ziah sual chu Kawrte≠thawveng chhuak a ni tih kan lo sawi ṭhatsak e. Sawi tur a tam, kan sawi zo seng lo, nghakhlel takin Fusion 2016 chu ilo ch‚ng dawn nia.

Tluangpuii Hmar, Instructress, Vakiria Institute of Fashion Technology