2023-a music aṭanga sum hmuh 10% in a pung

International Federation of the Phonographic Industry’s (IFPI) Global Music Report 2024 tihchhuah a ni a, kum 2023 chhunga khawvel puma music aṭanga sum hmuh chu kum hmasa aiin 10% in a pung a, sum hmuh hi USD tld. 28.6 a tling.

Kum 2023-a music aṭanga sum hmuh hi IFPI-in music revenue a record ṭan tirh, kum 1999 hnu lama a tam ber ṭum a ni a, a ṭum khatna atan paid streaming subscription hi mtd. 500 a chuang bawk.

Nikum chhunga paid streaming aṭanga sum hmuh hi USD tld. 14 a tling a, kum hmasa aia a tamna hi 11.2% a tling a, khawvel huapa music sales aṭanga a zahve dawn, 48.9% a tling pha a ni.

Streaming service langsar - Spotify, Apple Music, Amazon Music, YouTube Music leh Deezer te'n subscription fee an tihsan avangin sum hmuh hi a pung nasa hle. Subscription fee a pung chungin, music streaming subscriber hi khawvel huapin an pung hle a maktaduai 500 an chuang tawh a ni. Shared user leh family account nena chhut tel phei chuan, khawvel pum paid subscription awm zat hi mtd. 667 a ni tawh a, kum hmasa aiin 13% in an pung.

Sum lak luh lamah streaming service-te'n hma hruai viau mah se, record sale leh performance aṭanga sum hmuh pawh a pung chho hle. Kum 2023 chhunga CD leh vinyl revenue hi a zawna a kum thumna atan hma sawn lehin, USD tld. 5.1 a tling a, kum hmasa aiin 13% in a pung. Performance aṭanga sum hmuh hi 9.5% in a pung bawk a, USD tld. 2.7 niin, khawvel huapa sum hmuh aṭangin 9.5% a ni.

Music market-ah US chu no. 1 la ni chhunzawm zelin, nikum chhung khan music sales hi 7.2% in a pung. Japan chu pahnihna niin, sale hi kum 2023-ah 7.6% in a ṭhang bawk a, UK chu pathumna niin Germany chu palinaah a awm.