YouTube-ah 'Spider-Verse' animated short film tichhuak dawn

Sony chuan animated short film, 'The Spider Within : A Spider-Verse Story' chu March 27 hian Sony Pictures Animation YouTube channel-ah a tichhuak dawn.

'The Spider Within' ah hian Miles Morales mimal chanchin deuh bik tarlan a ni dawn a, Spider-Man ni chunga in lam leh school lama a khawsak dan te, anxiety a neih leh a sual chhuah dante a ni. Sony hian Kevin Love Fund nen thawk dunin animated short film hi an tichhuak dawn a, hei hi fund hnuaia mental health lesson plan, 'The Hero Within' pual a ni ang. KLF founder, professional basketball player leh mental health advocate Kevin Love chuan he short film hian a entu zawng zawngte, a bikin ṭhalai leh kum naupang zawkte hnenah an nihna pawm thiam a, harsatna an tawn chhohnaah pawh an mal lo a, thlawptu an nei reng tih a hriat thiamtir ngei a beisei tih a sawi. Director Jarelle Dampier pawhin he film kaltlang hian ṭhian leh chhungkawho zingah mental health chungchang ngaih pawimawh zualna leh, sawihona ṭha tak an neih ṭhin theihna tura a fuih a beisei thu a sawi.