Simon Cowell-a'n Netflix-ah talent show buatsaih dawn

Music mogul Simon Cowell chuan Netflix-ah talent show siamin, 2010-a UK 'The X Factor' kaltlanga One Direction an din ang, boy band ṭha tak din leh a tum.

Kum 64 mi, Cowell show tur atan hian UK-ah shooting an nei ṭan tawh nia sawi a ni a, production company Box to Box films a thawhpui dawn a ni. Apple leh Amazon Prime chuan show tichhuaktu nih hi an inchuh a, mahse, Netflix zawk hi sum tam tham tak nen inremna a siampui ta zawk nia sawi a ni bawk. Khawvel huapa boy band lar thei tur din leh a tum a ni. Kum 2010 khan 'The X Factor' kaltlangin Simon hian Harry Styles, Louis Tomlinson, Zayn Malik, Liam Payne leh Niall Horan-te awmna boyband, 'One Direction' dinna turin a pui a, he band hi a record label, Syco Record-ah inremna siampuiin, khawvel huapa boy band hlawhtling an ni chho ta a ni. Mahse Zayn Malik-a'n an band hi a chhuahsan hnuah, kum 2016 aṭang khan band angin an che chhuak zui tawh lo.