Miss Mizoram 2024 pageant : District pahnih aiawh tur a chiang tawh; Vawiinah Aizawl-ah open audition nei dawn

Miss Mizoram 2024 thlanna hi Zonet TV leh Mizoram Journalists' Association-in an buaipui mek a, district pahnihin an district aiawh tur an thlang fel tawh. Vawiin hian Aizawlah Open Audition neih a ni bawk ang.

Tun tum hi ZONET TV-in Miss Mizoram a buaipui vawi 4-na a ni a, kum 2017, 2018 leh 2020 khan hlawhtling takin a lo buatsaih tawh a ni. 2017-ah Rody H. Vanlalhriatpuii, 2018-ah T. Ramthanmawii leh 2020-ah Zirsangpuii chu Miss Mizoram atan thlan an ni.

Kum 2020 ang bawkin kuminah hian Miss Mizoram thlannaa district aiawh turte chu District MJA-te'n an buaipui a, district aiawh tura thlante hi Aizawla open audition buatsaihah tel ngai tawh loin, finalist an ni nghal ang.

Vawiina Aizawla Open Audition neih turah hian Mizorama cheng nghet apiang tel theih a ni a, district lama tel tawh, district aiawha thlan tak lohte pawh an tel thei a ni. Miss Mizoram 2024 Contest hi April thla tir lama ṭan tum a ni.

Saitual district MJA chuan March 23, Inrinni khan Miss Mizoram, Saitual atana an thlan PC Lalruatsangi d/o PC Malsawmkima, Saitual Dawr Veng chu miss lallukhum (crown) khumtirna leh miss sash bahtirna hun an hmang. Saitual district miss hi district bawrhsap John Lalngura'n a puang a; Miss Mizoram 2020 Saitual District Fiona chuan miss lallukhum a khumtir.

Siaha District MJA pawhin nimin khan Miss Mizoram 2024 Siaha District atana an thlan, Lalrinchhani d/o Jeff M Sanga, New Siaha West-II chu Siaha Press Club-ah miss lallukhum khumtirna hun an buatsaih bawk.

District danga MJA-te pawhin an district aiawh tur an thlang tawh hlawm a, tun kar chhoah hian miss crown khumtirna leh sash bahtirna hun an hmang hlawm ang. Hetih lai hian, district miss la tifel chiah lo district tlem azawng an awm bawk.