Kate leh Prince William-ten Northfolk-ah Easter Holiday hmang dawn

Princess of Wales, Kate Middleton chuan kar liamta Zirtawpni zan khan video message kaltlangin cancer a vei thu a puang a, chemotherapy a la mek tih a sawi. A natna chungchang a sawichhuah hian mipuite a ṭhawng hle a, lainat leh duhsak a hlawh hle. Hei vang hian ruahman lawk angin Easter-ah mipui hmaah a la inlan thei dawn lo.

January thlaa a pum zai a nih hnuah, cancer zungzam hi hmuh a nih thu Kate hian a sawi a, mahse eng cancer ber nge tih erawh a sawilang lo. February thla aṭang khan doctor-te thurawn angin chemotherpy hi a lak thu a sawi bawk. A cancer thu a puan tuk, Inrinni liam ta khan a pasal, Prince William leh an fate pathum - George, Charllotte leh Louis-te nen Easter Holiday hmang turin Norfolk-a Anmer Hall lam an pan a, chhungkuain hun an hmang dawn a ni. Kate hi a inzai hnuah mipui hmaa a inlan mai loh leh, Lal chhungkua lam aṭanga a chungchangah thuchhuah siam a nih loh avangin thu leng vak a tam hman hle a, hei vang hian a chanchin hi amah ngeiin a rawn sawichhuak ta a, Zirtawpnia video message a tihchhuah pawh hi ama ziah vek nia sawi a ni.