'Titanic'-a Rose-i chuanna thingphel USD 718,750 hralh

'Titanic' film-a lawng a chhiat hnua Rose-i chuanna thingphel, a dam khawchhuah phahna kha lilamin, USD 718,750 in hralh a ni.

1997 film, 'Titanic' film-a Rose-i chuanna thingphel hi fan tam tak inhnialna siamtu a ni. Thenkhat chuan he thingphelah hian Jack pawh kha a leng a, tuifinriat vawt lutukin a hmeh hlum tur lak aṭang pawh khan a him ve thei a ni ti tein an sawi. A film-ah erawh chuan lawng a chhiat hnua Rose (Kate Winslet) awmna, thingphel (kawngkhar chhe ṭhen) chauh a leng a, Jack (Leonardo Di Caprio) chu a len ve loh avangin Altantic tuifinriat tui vawt lutuk chuan hmet hlumin, a ruang pawh tuifinriat mawngah a tla thla ta a ni. Titanic director, James Cameron chuan he thil thleng avang hian email tam tak a dawn thu te, Rose chu 'mahni hmasial' leh Jack chu 'mi a' ti tea an rawn ankhum thute a sawi. Mahse a script-ah Jack chu thi tura tih sa a ni tawh a, mahse Rose-i chuanna thingphel erawh lo tih tet deuh tur chu a ni, a ti.