F9 tlangzarh hun an sawn hla
Fast and Furious movie thar tur F9 tlangzarh hun tur sawn hlat a ni leh a, nakkum May 28-ah an tlangzarh dawn.
James Bond film thar ber tur No Time to Die hnungzuiin F9 tlangzarh hun tur pawh hi sawn hlat a ni ve leh ta a, hripui leng vangin kumin chhung hian big budget film kan hmu tam hman dawn ta lo hle a ni.
F9 hi Covid-19 vanga film tlangzarh hun an sawn hlat hmasak ber pawl a ni a, sawn hlat a nih tirhah chuan nakkum April 2-a tlangzarh an tum a, chupawh chu la duhtawk loin tunah chuan May 28-ah an tlangzarh dawn ta zawk a ni. Ruahmanna an siam hmasak berah chuan kumin May 22-a tlangzarh kha an tum.
Vin Diesel, Michelle Rodriguez, Tyrese Gibson, Chris “Ludacris” Bridge, Jordana Brewster leh Nathalie Emmanuel-te kan hmu leh dawn chiang a, Charlize Theron pawh a inlan nawn leh ang a, Lucas Black pawh a lang leh dawn bawk. Fast and Furious series hi tunhmaa Kasauti ang deuh kha a ni a, thi tawh anga lang rawn inlan leh nawlh nawlh an awm ṭhin a, F9-ah pawh hian Han Lue lemah Sung kang kan hmu nawn leh dawn a nih hmel. John Cena a rawn inlan thar dawn bawk a, Cardi B-te pawh kan hmu dawn a ni.