FORBES: Khawvela hmeichhe thiltithei ber Angela Merkel
American business magazine lar tak Forbes chuan Nilaini khan The World's 100 Most Powerful Women 2020 list an tichhuak a, Germany Chancellor Angela Merkel chu hmeichhe thiltithei berah thlangin European Central Bank head Christine Lagarde chu pahnihnaah an thlang. Khawvel ram ropui ber United States of America-a Vice-President ni mai tur Kamala Harris chu pathumnaah an thlang bawk.
Hmeichhe zinga thiltithei ber Angela Merkel
Angela Merkel hi Germany-a hmeichhe Chancellor hmasa ber niin kum 2005 aṭang khan a la ni ngar ngar a, tunah hian a term lina chelh mekin November 2018 khan Christian Democratic Union leader a nihna chu kalsanin kum 2021-ah chuan chancellor nih a tum tawh lo a ni.
Germany-in sum lama harsatna nasa tak a tawh laia an ram kaihruaitu niin an ram sum dinhmun ṭhat chhuah leh chhanah pawh ani hi hma la tu ber a ni a, Forbes chuan hotu ṭha tak a nihna chu a hmalaknaah a lang a ni tih tarlangin Donald Trump duhdan kalha Syrian raltlan maktaduai chuang an rama luhtir a phalna chuan chu chu a tilang chiang hle niin an tarlang.
Kumin October-a Europe ram hrang hranga zirchianna an neihah pawh puitling 75% lai chuan Europe ram danga ram hruaitu dangte aiin Merkel hi an ring zawk a ni.
Pahnihna Christine Lagarde
Christine Lagarde hi nikum November 1 khan European Central Bank head ni ṭanin hmeichhe zinga hetiang dinhmuna ding thei hmasa ber a ni. Hripui nasa taka a leng chunga Euro Zone economic a tla chhe thei lo chu a fiahna paltlang langsar ber niin kum 2011 aṭanga nikum kum laihawl thleng khan global monetary system pangngai takin a kal reng a nih tih enfiahin International Monetary Fund chu a lo kaihruai tawh bawk a ni.
Hmeichhe thil tihtheite chu
US hmeichhe Vice President hmasa ber tur Kamala Harris chu pathumna a ni a, European Commission president Ursula von der Leyen chu palina a ni. Microsoft neitu Bill Gates-a nupui Meinda Gates chu pangana a ni ve bawk.
Forbes The World's 100 Most Powerful Women list-ah hian Oprah Winfrey chu 20-na a ni a, India ram finance minister Nirmala Sitharaman chu 41-na niin, Queen Elizabeth II chu 46-na a ni thung.
Zaithiam zingah chuan Rihanna, Beyonce Knowles leh Taylor Swift-te pawh langin 69, 72 leh 82-na an ni a, lemchan thian Reese Witherspoon chu 92-na a ni bawk.