Spider-Man 3-ah Jamie Foxx 'Electro' a lokir dawn

The Amazing Spider-Man 2-a kan lo hmuh tawh Jamie Foxx 'Electro' chu Spider-Man: Far From Home chhunzawmnaah kan hmu nawn leh dawn a, chu chuan sawi zui a hlawh hle.

Jamie Foxx chuan hemi chungchang hi a Instagram-ah a post zuai a, mahse a paih lehnghal a, chutichung chuan titi a titam nghal hle. Andrew Garfield-a channa The Amazing Spider-Man 2-a a Electro ang lo takin version tharah hi chuan a pawl(blue) dawn lo tih a sawi. Hei bak erawh hi chu sawi zui tam vak a nei lem lo a, chutichung chuan mi ṭhenkhat chuan Spider-Man 3-ah hian multiverse kan hmu ṭan tawh dawn nitein an ngai. Spider-Man: Far From Home end credit scene-ah Tobey Maguire-a Spider Man-a The Daily Bugle editor Jonah Jameson lema chang J.K. Simmons chuan a role ngai a rawn inlanpui leh bawk si avang khan titi a tam zui hle a ni.

Heng erawh hi chu zeldin titi mai a la ni rih a, chutihrual chuan Spiderman Multiverse animated movie a chhuah hnu lawk khan helam hawizawng hian titi a tam hle a, Tom Holland, Andrew Garfield leh Tobey Maguire-te pathum hi film pakhatah kan la hmu ho ngei dawn niin mi ṭhenkhat chuan an ring sa tawh a, chumi thlendikna tur kawngah chuan Spider-Man 3 thar tur pawh hi mi ṭhenkhat chuan hman a ni dawn niin an ring.

Foxx-a'n a IG post a delete leh chhan pawh hi Marvel leh Sony-in an delete tir leh a nih a rinawm a, mi tam takin an rin lawk ang deuhin eng emaw chu studio lam hian zep ruk an nei chu a nih hmel.

Film title an la pek chiah loh Spider-Man 3-ah hian Tom Holland kan hmu leh dawn tih chu thil chiang sa a ni a, Zendaya leh Marisa Tomei-te pawh an inlan leh dawn a ni.

Jamie Foxx-in IG-a post a siam hma lawk hian entertainment news lam hre hma thei tak The Hollywood Reporter chuan an tarlang hmasa a, Foxx hian a hnuah a rawn nem nghet zui a ni.