'Dâk Pu' a chhuak hnai ta

Chiangtea Videography, Sihphir kutchhuak Mizo film thar 'Dâk Pu' chu a chhuak hnai ta. April 26, 2024 (Zirtawpni) zan dar 8:00 hian Vanapa Hall-ah release tum a ni a, hemi zan hian Rs. 100 man siamin, a duh apiang tan Vanapa hall-ah en theih a ni ang.

Chiangtea Videography leh Amawii Hero te ṭangkawpin an pho chhuah tur, 'Dâk Pu' film-ah hian Mizo Idol aṭanga kan hriat, Mizo film ropui berte zinga mi, Khawnglung Run aṭanga mite hriat hlawh Alex-a leh Mizo nula hmelṭha, film chan thiam tak MS-i Hmar te'n lead role an la dawn. Anni bakah hian Mizo Film leh Entertainment lama sulhnu ngah em em mai Adama, Hruaia Sailo, Sangteii Renza te an lan dawn bakah film chan thiam leh zei tak tak eng emaw zat kan hmu dawn bawk. Nula leh tlangval inngaihzawnna, a hlimawm lam leh thil chi hrang hrang a invet buai nuaih a ni ber a, a thawnthu hian a tawpah vanneihna nge vanduaina a rawn hrin chhuah dawn tih hi a film entute chauh lo chuan an hriatthiampui lovang a, a film zûnah an uai pha lo mai thei.

Dâk pu film OST ‘Pasalṭha’ chu tunlaia zaithiam boruak nei lian, Young Fella chuan a YouTube channel-ah dahin, ni 10 chhung lekin view maktaduai khat chuang a nei hman der a ni.