Virthli a tleh leh dawn ta

Mizoram University (MZU)-a MZU Students' Council-in kum tina kûtpui a buatsaih ṭhin, 'Virthli' chu kumin atan vawiin, April 1 aṭanga 5 thleng an hmang leh dawn.

Kumin Virthli thupui atan hian Latin ṭawng aṭanga lak,'Altius Volare' (fly higher) tih chu hman a ni. Infiamna, lam leh zai, thu inziahsiak, e-gaming, Miss leh Mister Varsity thlanna, Runway Showdown leh intihhlimna ṭhahnem tak buatsaih a ni leh dawn.

Kumin Virthli-ah hian a vawi khat nan zan tin rimâwi hmanga inawihna tur 'Night Life' chu MZU Park-ah hman a ni dawn bawk a. Pawn lam mite tan Rs. 50 chawiin zai thiamte zai leh lam thiamte lâm a chhim theih dawn a, a tawp kharna pui (Inferno) chu Rs. 200-in a chhim theih bawk ang.

Virthli buatsaih tur hian dawr leh pisa hrang hrangte thawhpui an ni. MZU Students' Council leh zirlaite chuan Virthli tihhlawhtlinpui turin, a duh apiangte chu an kûtpui hi chhim a, hun hlimawm tak hmanpui turin an sawm.