Mamawhtute tan Taylor Swift

Midang ṭanpuina tur sum an nei alawm, tiin kan lo ngaihtuah pawh a ni mai thei. Mahse a nei nazawng hi an thilphal kher lo tih chu tlang hriat a ni thung. Khawthlang zaithiam lar zinga hmingchhiatna lian tham nei khat tak leh lar kal tluang tak, kum 10 liam ta chhung vela zaithiam huhang ngah ber ni reng Taylor Swift chu midang tan a luang chhuak leh ta.

Midangte tan Taylor Swift a thawk chhuah tih leh ṭanpuina tur a pe tih vel hi media lamah hian a khat tawkin chhiar tur a awm fo a, Thawhlehni liam ta mai pawh khan midangte tan 'Love Story' hitmaker hi luang chhuak lehin Covid-19 vanga harsatna tawk nu pahnih hnenah $13,000 ve ve a pe.

Kum 30 mi lek ni chunga record lian tham tak tak lo siam tawhtu Taylor Swift chuan Nashville-a cheng Nikki Cornwell leh Michigan-a cheng Shelbie Selewski-te hnenah ṭanpuina hi a pe a, GoFundMe page-ah an tan hian thuziak hnut chhiah zui bawkin Washington Post aṭanga an chanchin a hriat thu leh duhsakna a hlanna thu a ziak bawk.

Nikki leh Shelbie-te chanchin hi Washing­ton Post-ah tarlan niin Covid-19 vanga an hna an chan thu leh leiba an neih ngah tawh thu vel inziak chu Taylor Swift hian lo chhiar fuhin an tan a luang chhuak ta a ni.

Taylor Swift hian a fan-te lawmna a thlen leh bawk. A fan pakhat Ohio-a mi chuan Instagram-ah kar hmasa khan video post in Taylor-i hla Christmas Tree Farm chu background music-ah hmangin Taylor Swift chu a zaithiam duh ber a nih thu leh an local food bank-a pek tur food drop box an dah nghal thu a ziak a ni. He a post-ah hian Taylor hi a mention zui bawk a, chu chu Swift hian lo hmuin a lo reply a, a reply-na hi Twitter-ah a tarlang zui leh bawk.

'Cardigan' singer hian an local food bank tarlanga thilṭha tih a duhna chu a ngainat thua chhangin an khuaa awm 'Our Community Hunger Center'-ah thikpek a pek phah thu a hrilh tel bawk a ni.