Thazual Gospel: A kar hnihna atan no. 1-ah Zorinsanga

Khiangte Construction Ṭhazual Gospel chart-ah Zorinsanga chuan a hla 'Sam 23' chu a kar hnihna atan no. 1 a la nihpui.

Ṭhazual chart-ah hian kar hnih chhung a zawna a chung ber dinhmun hauh thei hi an tam lo hle. Mahse Zorinsanga chuan he dinhmun hi a rawn luah thei a, a zaithiamin a hla a ṭha bawk a, a awm hle. Praise On 2016 aṭanga kan hriat lar, Zorinsanga zaithiamzia hi chu sawi nawn a ngai tawh lo, a aw a ṭha a, a hla sak apiang mai hneh leh mawi takin a rawn sa thei zel a, a zai nungin ngaihthlak a manhla ṭhin hle. 'Sam 23' hi a hmaa kan lo tarlan tawh angin, Mizoram Synod hnuaia family guidance & counselling centre-in Kristian chhungkaw short film insiamsiak a buatsaih ṭuma Ramhlun North Presbyterian short film OST a ni.

Lalhmudiki chuan 'Ka vui lo ve' tih chu no. 4 aṭangin no. 2-ah a rawn chhohpui a, he hla hi Vala Sailo phuah niin, February 18 khan a tichhuak a ni. Priscilla Laldinpuii Fanai pawhin 'Min hmangaihna ropui' tih chu hma a rawn sawnpui a, no. 3-ah a lang. Nghaktea Fanai 'Thihna luipui' leh One in Christ 'Ka tan hla mawi ber' tih chu Top 5-ah an lang bawk.

Ṭhazual Gospel chart tharah hian Sanga Renthlei chuan a dinhmun ngai no. 6 a luah chhunzawm a, Lalthansangi leh Mawimawii te pawh an la lang chhunzawm zel. Hetih lai hian Lalmuansangi leh Laldinsangi te chu chart-ah an rawn lang thar ve thung.