Revd. Dr. Chuauṭhuama pual hun hmang

Revd. Dr. Chuauṭhuama Memorial Committee buatsaihin, nimin April 1, 2024 khan Synod Conference Centre, Mission Veng, Aizawlah Revd. Dr. Chuauṭhuama pian cham denchhenin, a nun leh rawngbawlna avanga lawmthu sawina hun hman a ni. He hunah hian a lehkhabu ziah, 'Bawih Ṭhahnem Lo: Kum 17+ Sulhnu' leh mi hrang hrangin Revd. Dr. Chuauṭhuama chungchanga an thu ziah lak khawm, 'Lalpa Chhiahhlawh Revd. Dr. Chuauṭhuama: Mite'n Tu Nge A Ni An Tih?' tih lehkhabute chu tlangzarh a ni bawk.

He hun hi Rev .Dr. Lalawmpuia Hauhnar-in a kaihruai a, Rev. Zosangliana Colney-in Revd. Dr. Chuauṭhuama chanchin ngaihnawm tak (eulogy) sawiin, Revd. Dr. Chuauṭhuama nun leh rawngbawlna video clip hmuhnawm tak entir a ni bawk.

'Bawih Ṭhahnem Lo: Kum 17+ Sulhnu' hi Revd. Dr. Chuauṭhuama'n Mizoram Synod hnuaia a thawh chhung, kum 17 leh a hnu lama a inhmanna hrang hrang a ziahna a ni a, lehkhabu preview hi Rev. Dr. LH Rawsea'n neiin Rev. Dr. FH Liansangzuala'n a tlangzarh. 'Lalpa Chhiahhlawh Revd. Dr. Chuauṭhuama: Miten Tu Nge A Ni An Tih?' lehkhabu preview hi Upa R. Lallianzuala chuan neiin, Rev. Prof. Tlanghmingthanga'n a tlangzarh a ni.

Revd. Dr. Chuauṭhuama hi Mizo Pathian thu thiam langsar ber zinga mi, Mizo hnam leh Kohhran ṭhatna tur leh hmasawnna tura huaisen taka au chhuak ṭhin leh thuziak mi thawhhlawk tak a ni a, Zonet pawhin kum 2007-ah khan Zonet Award a lo hlan tawh a ni. Vanglaini chanchinbuah columnist a ni a, chawlhkar tin Inrinni apiangin a thuziah tihchhuah ṭhin a ni a, kum 10 leh thla li vel a chhuak hman a, hemi chhung hian a thuziak hi 500 chuang a chhuak hman. January 4, 2024 khan heart attack avangin a boral a ni.