Pierce Brosnan-a'n James Bond atan Taylor-Johnson duh

James Bond lem changtu thar tur chuan buaipui a la hlawh zel a, tun thlengin thlan fel an la awm lo. Film pali-a James Bond lema lo chang tawh, Pierce Brosnan chuan tun hnaia sawi rik thar, Aaron Taylor-Johnson chu 007 thar atan hian a duh tih a sawi.

Kum 33 mi, Taylor-Johnson hi Daniel Craig thlaktu tura sawi rik thar a ni a, film pali-a Bond lem chang tur hian inbiakna pawh neihpui nia sawi a ni. Mahse thu thang ringawt a la ni a, engmah tihfel a la awm lo. Brosnan bakah "On Her Majesty's Secret Service" (1969)-a Bond lema chang, George Lazenby pawhin Taylor-Johnson hi Bond lem chang tur hian talent leh zûn a nei ṭha tiin, a thlawp thu a sawi ve bawk. Hetih lai hian Taylor-Johnson hian a film thar tur, "The Fall Guy", "Nosferatu" leh "Kraven the Hunter" a buaipui mek thung.