Box Office : Roreltu thar Godzilla x Kong: The New Empire
North American box office-ah roreltu thar a rawn lang. 'Godzilla X Kong: The New Empire' chuan 'Ghostbusters: Frozen Empire' um chhuakin no. 1 a ni.
Warner Bros leh Legendary monster film hian tlangzarh karah North America-ah USD mtd. 80 zet a la lut thei. MonsterVerse franchise film pangana hi tlangzarh karah USD mtd. 45-55 vel la lut tura beisei a nih laiin, beisei a rawn khum zo hle. Franchise zingah opening nei ṭha ber dawttu niin, 2014-a tihchhuah, tlangzarh kara USD mtd. 93.2 la luttu, 'Godzilla' chauh a pha lo. International-a a lak luh hi USD 114 tling bawkin, khawvel puma a sum lak luh hi USD mtd. 194 a tling nghal der.
Rebecca Hall, Brian Tyree Henry leh Dan Stevens-te channa hi box office lamah a chet ṭhat viau laiin, critics review lamah erawh a score ṭha lutuk lo. Rotten Tomatoes-ah average 55% a hmu a, mahse, audience lamin an lawm thung a, CineScore-ah 'A-' an pe.
"Ghostbusters: Frozen Empire" chu no. 2-ah tla thlain, USD mtd. 15.7 a lak luh belh leh. "Ghostbusters" film franchise film pangana hi a kar hnihnaah hian entu 65.1% in a tlahniam a ni. "Dune: Part Two" chu no. 3-ah awmin, USD mtd. 11.1 a hmuh belh leh. USD mtd. 10.2 la luttu "Kung Fu Panda 4" chuan dawtin, Sydney Sweeney horror film "Immaculate" chu a kar hnihnaah no. 5-ah a awm a, USD mtd 3.3 a la lut a ni.