Zaninah PB Lianhminga pualin concert nei dawn

Mizo musician hriat hlawh leh sulhnu ngah ber pawl, PB Lianhmingthanga hriatrengna leh ama puala concert, 'PB Lianhmingthanga Tribute Concert' chu zanin dar 7:30 aṭangin Dawrpui Multipurpose Centre-ah neih a ni dawn.

Zanin concert-a zaithiam inlan turte an hraw tlang hle. PB Lianhminga band lo telna ṭhin Albatross bakah Mizo band ṭha Dream Hunter, K.Hminga band leh Boomarang te pawh an inlan dawn.

Solo artist zinga kan hriat lar - Jaui, Rebecca Lallawmsangi, Zoramchhani te bakah stage lama kan hmuh tam tawh loh, Zoram pum huapa lo lar tawh ṭhin Liandingpuii, Mimi Renthlei leh Mami Varte te che vel pawh kan hmu leh thei dawn. Mipa zai tur zingah hian Zorema, Lungmuana leh Henry Thanzaua te pawh an tel.

PB Lianhminga hi musician hmasa PB Liantluanga fapa niin 1974 khan a piang a, talent nei ṭha tak a ni. Mizo musician zingah music track siama rimawi khawvela hriat hlawh ber pawl a ni a, a hunlaia studio lar leh lian ṭhin, Vega Studio-ah rimawi siam hna bul ṭanin, Zoram Studio-a senior musician a ni. A vanglaiin zaithiam lar pha chinte chuan a music siam kher duhin pan a hlawh hle. Rimawi khawvela Mizoramin award kan neih - Lelte Award, Rimawi Khawvel Award leh award dang vawi eng emaw zah a lo dawng tawh a ni. Rimawi bakah infiamna lamah pawh talent a nei ṭha a, volleyball, badminton, football-ahte college level, state level leh national level thlengin medal eng emaw zat a la bawk.

PB Lianhminga hi kum la naupang takin May 3, 2023 khan chatuan ram a pan ta a ni. Zanina a puala concert neih tur hi Janis Hnamte-in a host ang. Ticket hi a hmunah lei tur a awm dawn a, Rs. 300 man a ni ang.