Journalism lam chawimawina Pulitzer Prize an puang

American journalism chhunga chawimawina ropui bera ngaih Pulitzer Prize chu Thawhṭanni zan khan an puang. Kumin hi Pulitzer Prize an sem vawi 100-na chiah a ni.

Associated Press chuan Public Service award an dawng a, an dawnna chhan hi an thu tihchhuah 'Slaves may have caught the fish you bought' aṭangin a ni. Finalist-ah hian InsideClimate News leh Tampa Bay Times te an lang.

Breaking News Reporting chawimawina thung hi chu Los Angeles Times-in an dawng thung. Anni hian San Bernardino-a inkahna thleng an cover aṭang khan an dawng a, he inkahna hi an cover ṭha hle a, an reporter-te pawh an huaisen hle.

Investigative Repoting award hi Tampa Bay Times leh Sarasota Herald-Tribune ten an dawng. Tampa Bay aṭang hian Leonora LaPeter Anton leh Anthony Cormier te chu investigative journalist an ni a, Sarasota Herald Tribune-ah hian Michael Braga a ni. An dawnna chhan hi Florida-a mental health chungchang an chhui chianna aṭangin a ni.

ProPublica-a mi T. Christian Miller leh The Marshall Project-a mi, Ken Armstrong te chuan Explanatory Reporting-ah award an dawng a, an dawnna hi pawngsual tawkte enkawl leh pawngsualtu chhui zui kawnga dan kengkawhtute hlawhchhamna chungchangah a ni.

Tampa Bay Times bawkin Local Reporting chawimawina an dawng a, Washington Post chuan National Reporting an dawng thung. The New Yorker-a mi, Kathryn Schulz chuan Feature Writing chawimawina a dawng a, a thuziak hi 'The Really Big One' a ni.

Boston Globe-a mi Farah Stockman chuan Commentary huangah lawmman a dawng a, The New Yorker-a mi Emily Nussbaum chuan Criticism-ah lawmman a dawng bawk. Editorial ṭha bera an thlan chu Sun Newspapers, Florida-a Charlotte Harbor-a mi, John Hackworth-a ziak 'Fierce, indignant editorials that demanded truth and change after the deadly assault of an inmate by corrections officers' a ni.

Editorial Cartooning chu The Sacramento Bee-a mi Jack Ohman chuan a dawng a, Breaking News Photography hi New York Times-a mi, Maricio Lima, Sergey Ponomarev, Tyler Hicks leh Daniel Etter te leh Thomson Reuters-a mi ten an dawng. Feature Photography hi Jessica Rinaldi, The Boston Globe chuan a dawng.