Lersia Play-ah 'Thih leh Dam' hralh a kal

Mizo film streaming platform, Lersia Play aṭanga March thla chhunga film hralh chhuah hnem ber chu 'Thih leh Dam' a ni.

'Thih leh Dam' hi February 23, 2024 khan release a ni. Action-crime-drama niin, director B. Lalbiakvela a ni a, script writer a ni bawk. Director of photography hi Ngaihawma Fanai niin, sound design & mastering hi Mathana, EFX Audio a ni. Mizo kutchhuak background score (Background music) vek an hmang. He film-ah hian lemchan khawvel lama kan lo hmelhriat tawh, Gilbert Colney leh MSI Chhangte te'n lead role an la a, Mizo actor ṭha Papuia Pachuau leh Lalawma bakah, Laltleipuii Punte te kan hmu bawk. Excise head constable pakhat rinawm leh taima, pute’n ti tura an tih huaisen leh rinawm taka hlen chhuak zel ṭhin, mahse, a rinawmna leh huaisennain dinhmun hlauhawm taka a dintir chungchang a ni.

March thla chhunga Lersia App kaltlanga film hralh hnem pahnihna chu '2Wheeler Taxi Driver' niin, February thla khan film hralh chhuah hnem ber a lo ni tawh a ni. February 9-a release a ni a, director hi Mike H. Lalsangzuala niin, a changtute hi Vanlalhmangaiha, Malsawmsangi Tlau, Aaron Malsawmdawngzuala, Maneihi Fanai leh Isaac Chawngthu te an ni.

In House Production kutchhuak, 'Rini leh Rina' chu film hralh hnem pathumna a ni. January 19-a tlangzarh a ni a, Drew Pachuau chu director niin, script writer Samuel L Pachuau a ni a, film lama kan hriat lar–Sangsangi, Francis Malsawmdawngkima, Esther Zongte leh Alli Sandra Lalrinhlui te an chang.

Lersia App kaltlanga film hralh chhuah hnem Top 5-ah hian March 8-a tlangzarh, Kristian film, 'Awma Ka Ni' leh, March 23-a tlangzarh, 'Thingtlangpa Thlahrang' te an lang pha bawk.