Supernatural horror film thar The First Omen

American supernatural horror film thar, Arkasha Stevenson-a direct, Ben Jacoby thawnthu aṭanga screenplay, The First Omen chu April 4 khan mipuite en theih turin theatre-ah chhuah a ni ta.

The First Omen hi The Omen (1976) prequel a ni a, The Omen franchise film parukna a ni. He film-ah hian Nell Tiger Free, Tawfeek Barhom, Sônia Braga, Ralph Ineson leh Bill Nighy te an chang.

He film-ah hian American nula pakhat chu Rome khawpui chhunga Biak In pakhatah thawk tura rawih a ni a, rin loh deuh deuh thil a tawng chho a, Bible-in khawvel tawpa rawn piang tur a tih, Antichrist chungchang a chhuina kan hmu dawn a ni.

The First Omen trailer en tawh te'n chan chawp a an loh thu sawiin, a tak ngeia exorcism thleng anga ngaite pawh an awm hial a ni.

Vanneihthlak takin The First Omen hi Aizawl theatre-ah ngei chhuah ve nghal a ni a, nizan aṭang khan RemPham'Ly Cinema-ah en theihin a awm tawh a ni. A movie hi kar khat chauh permit pek a nih avangin, en tum tan chuan ticket chuh ran a fuh ang. Horror ngainate tan chuan hmaih phal chi a ni awm lo e.