LZa'n thirsakawr hmangin India chhim tàwp Kanyakumari a thleng

Leilung leh a chhunga awmte venhim pawimawhzia tlangaupuia, thirsakawr hmanga India ram fang mektu, Vanlallawmzuala Varte (LZa) s/o VL Chhuanawma, Mission Veng chuan April 6, Inrinni khan India ram chhim tàwp, Kanyakumari a thleng.

'Ride to clean air’ tih thupuia hmanga thirsakawra India ram fan chhuah tumtu LZa hi Inrinni zan khan Kanyakumari-ah a riak a, nimin khan Kerala khawpui Thiruvananthapuram a pan. Kanyakumari thlengin km. 6,306 a tlân tawh a, km. 10,000 chuang tlân tur a la nei.

Ruahman dan chuan, LZa hian Kanyakumari aṭangin hmar lamah Jammu & Kashmir leh Ladakh lam a pan char char dawn. J&K leh Ladakh a pannaah hian India ram khawthlang lam state-te a hrút dawn a; state/UT khawpui - Panaji (Goa), Mumbai (Maharashtra), Gandhinagar (Gujarat), Bhopal (Madhya Pradesh), Jaipur (Rajasthan), Delhi, Chandigarh (Punjab), Shimla (Himachal Pradesh), Srinagar (J&K) leh Leh (Ladakh)-te a tlawh ang.

LZa hian January 25, 2024 khan Aizawl a chhuahsan a; state khawpui leh hmun pawimawh - Agartala (Tripura), Shillong (Meghalaya), Guwahati (Assam), Ranchi (Jharkhand), Kolkata (West Bengal), Bhubaneshwar (Odisha), Raipur (Chhattisgarh), Hyderabad (Telangana), Nellore (Andra Pradesh), Chennai (Tamil Nadu), Bengaluru (Karnataka), Rameswaram/DKD Point (Tamil Nadu) leh Kanyakumari (Tamil Nadu)-te a tlawh tawh a ni.