Fashion fiesta

Tun thla chu kar hmasa lama ka lo thailan tawh ang khan Mizoram History-a a vawi khatna a ni hial ta ve ang tih turin fashion show hmuh tur a tam ber ṭum a ni awm e. Kum tinin Zoram bikah hmuh theihin fashion industry bikin hma kan sawn em em a, kumin ngat phei chu show hrim hrim chu thu hran ni se, fashion institution lian te zingah inelna thianghlim a paw chhuak a, hun lo kal leh zel tur atan a ṭangkai hle turah ngai ang. Kar kalta Zirtawpni thil thleng mah ni se a hmuna chhimtu leh ka intih thu ve theihna anih miau avangin tlem azawng tarlan ve a ṭhain ka hria.

Vanneihthlak takin Zoram chhungah designer ṭha tak tak an tam tehlul vei nen, a vawi khatna (ni chiah loin) tur atan endiktu thlan chhuah zingah ka tel ve hlauh mai a, ka endikpui turte hming ka hriat tirh phei chuan zamawm dawn riauin ka hria a, Zoram chhunga a ber ve ve Pi Lucy Sailo leh Charlie (Heritage Mizoram) te an ni a. Beiseina sang tak nen show hma kar khat awmah chuan zirlaite thawmhnaw endikna hun kan neihpui a, beisei phak bak leh rin loh tak maiin Mizo ṭhalaite kan themthiam tawhzia a takin ka han hmu a, ramp-a nalh taka model-in a rawn hak chhuah hnua hmuh ngawt ai chuan thawmhnaw tin mai lepse veka engtiang chiaha hautaka duanchhuah nge a nih tih te han hriat khan a hlutna a ti tam lehzual hle a ni.

A tirte aṭangin R. Laltlanthangi (Te-i) collection Wild Heart tih chuan ka mit ala fal hle a, he collection hi ka duh nachhan em em pakhat chu instructor kum ruk chuang ka lo nih ve tawh hnu hian 'tiang ema theme man chiang leh collection dangdai hi ka la hmu tam lo hle a ni. A tlangpuiin a thawmhnawte hi recycle a ni deuh vek a, a tihlu zualtu nia ka hriat bawk chu handwork, cheimawi, painting leh, ṭhenkhatina a ṭangkaina kan hriat miah loh tur thil ho te te aṭanga nalh dangdai tak tak a siamchhuak hi a ni. A theme mil takin fringe leh frills a tam hle a, dreamcatcher, ama siamchawp ngat nen, inchei deuh nia hak chhuah theih, inchei vak loha han hak pawha langsar chuang si lo anihna te leh, a rawng a chawhpawlh dan mawi em em mai te chu ka mit latu pakhat a ni. Zirlai 23 zingah most creative collection ala nghe nghe.

Best collection latu F. Hmangaihthangi (Hma-i) thawmhnawte erawh a dum lam rawngkai vek niin puanṭhui experience ngah tawh tak ṭhui ni awm ziazangin a dakin a hnum hlarh mai a ni. Sawi vak mah ila a mawina ka sawi chhuak zo dawn chuang lova, a collection inspired tu zaithiam fam ta, Whitney Houston iangin chul thei lo tur design, simple nalh tak tak kan hmu bawk a ni. Vanlalrempuii Ralte (Remi) chuan a collection Starry Night chu best garment construction a lakpui a, lace leh net dum tawpah beads leh sequins te hmangin zana arsi Íng ang takin a chei tle sep sep a, a designer thawhrimzia a pho chhuak chiang hle a ni.

Best Craft Endoresment erawh Vanlalzawniín lain, Africa rama Tribal ho aṭanga inspiration lain collection dangdai leh mawi tak kan hmu bawk a ni. Most Promissing Student Hawihkimi (Kimi) collection erawh hmanlai Pharoa hunlaia chen ve chakawm khawpin khatih hunlaia an hmeichhiate inthuam dan mawi tak tak kha a rawn ti langchhuak a, mimal taka ka lo ngainat em em chu taksa rawng leh avar inpawlh, gown bandage dress kan tih ang deuha invet hnawk nuaih mai, han en mai pawha an mitthi tawhte an sawngbawl dan chi, khat Mummy style deuha duanchhuah kha a ni. Phengphehlep mawina rawn tilang pahfawmin Lalhriat≠puii collection Pretty to See, Hard to Catch collection chuan Lucy Special Award a dawnpui bawk. He Award bik hi Pi Lucy Sailo-in zirlai, tlema harsatna neite tana a pek ṭhin bik a ni. Mimal taka themthiam ka lo tih em em, Award la ve lem lo mah se mimalina rilru lama Award ka lo pek ve tawp, Emily Lalduhawmi theme Hathsumi Miku, Japanese zaithiam lar tak mai leh Victorian hunlaia an inchei dan kaihkawp chuan, mit a lain a designer kut themthiamna a takin ka hmuhpui a, Japanese nihliap leh fan te siam chawp vekin, a colour combination chu lar deuh deuh ni mah se, rawng inmil lo deuh tura ngaih a rawn belkhawm thiam kha a collection tihlu zualtu a ni.

22nd April 2016, zan dar 8:00 arik meuh chuan Electric veng YMA Hall chu mipuiin an tlim hmur mai a, ramp feet 60 lai maia seiah chuan model nalh tak tak 18 lai mai chu group thuma inṭhenin zirlai 23-te collection pakhat te tein an rawn chhuahpui a, an show tidangdaitu pakhat, theme tina choreography (an kaldan) hran ṭheuh an hmang thei leh, an theme mil em em tura music dangdai leh nalh tak tak kan hmu zel thei kha a buaipuitu, an Sir Ruata thluak ni ngei turah ka ngai hmiah. Show a tihmuhnawm dangdai hle. Model thar lam nalh tak tak kan hmu bawk a, Micky Chhangte chuan host-in, Class XI leh XII commercial garment and design making te pawhin kawr pakhat ṭheuh rawn duangin an show ve nghe nghe a ni. Show kara zaithiam vawi khat zai tih loh chu show hi a kal mawp mawp a, mit a tlaiin hluttu pawh an ṭhahnem hle. Awards latute tivannei zual turin Ford company Aizawl chuan Rs. 5,000/-
ṭheuh pein Tiens Company ten an product-te a thlawnin an pe bawk. Show tihlawhtlingtute zinga mi Sir Papuia, Miss Siamsiami, Sir Ruata leh VSE neitu Sir Marema te an thawhhona a ṭhain show ropui tak, 1 year fashion designing course zirlaite tan an buatsaihsak thei hi a ropuiin, hemi line-a kal mekte leh la kal turte tan chona nasa tak min chhawp chhuahsak a ni.

Tluangpuii Hmar

Instructress, Vakiria Institute of Fashion Technology