Pantei'n concert album lam daih a buaipui

Nikum hmasaa album a tihchhuah hnuah khan music video thar pawh a nei leh lo ta vang a, ama album tur pawh a la buaipui lo. Lalpanliani, Maphasy hmang Mizotena kan star em em hian tuna a buaipui deuh ber chu concert album lam daih a ni.

Pantei hian album concert an buatsaih thu Vanglaini a hrilh a, he concert album hi ama mimal concert-na ni loin, Yangon Mizo Kristian Ṭhalai Pawl tena Gospel Live Concert an buatsaihah khan Pantei pawh zaiin, he concert album hi an buaipui mek. Hei lo a dang chu kumin March ni 3 leh 4-a Tahan, Saṭawm Field-a Kutpui 2016 an hman ṭuma concert kha album-a siam mek a ni bawk a, kumin hi chuan zawrh chhuah hman ngei an tum.

Programme pawh a nei nual a, amah pawh a zin nasa. Khawbunga Mizo Hla Kungpui Muala a thawh nga nana mi an dah belh ṭum khan a zai a, hemi bakah Rihkhawdara NLD Party hruaitute lawmnaah a tel bawk. Hengte bakah hian programme neuh neuh a nei nual.

Pantei hian hla mal a tichhuak thut mai thei tih a sawi a, mahse engtikah nge a tihchhuah theih ang tih erawh a sawi thei lo. May thla chhung hi chuan kan hmu hman dawn lo ngei a, ka hmu lawk lo pawh a ni mai thei.