MSL Season 2 Dance Battle Champion Riborn

Zirtawp zana boruak sang tak kara Mizoram Super League neih zawh takah, Halftime Dance Battle Champion atan Riborn Dance Crew chu puan an ni a, Runner Up atan nikum Dance Battle Champion Nerds of War a ni thung.

Dance Crew pahnihte hi an thiam dan a rual khai hle a, an level pawh a sang hle. Final-ah hian vawi hnih an inel a, a hmasa zawkah Mizo Challenge neiin, hetah hian Mizo Hnam lam an choreo-ah an telh a, a tihmuhnawmin, choreography-a an ṭhatzia a lang. A zan hnih naah hian 90s challenge an nei thung a, 90s hunlaia music video lar aṭanga an dance steps te an telh a ngai thung a ni. An point inthlauhna pawh a tam lo hle a, Nerds of War hi execution leh showmanship-ah sang zawk mah se, creativity leh choreography-ah Riborn crew te hi an pha lo a, Riborn Crew hi chak zawk a thlan a ni.

Riborn te hian an zan hmasa ber aṭangin choreography mai bakah costumes lamah pawh an rawn ṭang hle a, an inbuatsaihna hautakzia pawh a hmuh theih. Member 6 ni anga inziak lut kha, an member pakhat, Immanuel-a'n harsatna a tawh avangin Final-ah a inhnukdawk a, member 5-in Final-ah hian an inlan ta thung a ni. Final-a langte hi Marina Khawlhring, Zuala Hmar, Mawi≠mawii Hmar, Priscilla Hmar leh Glimmer Chhandami te an ni. Anni hian winner trophy leh Rs. 20,000 an dawng.

Runner up Nerds of War-a an member te chu: Naom Chhangte, Jammy Ralte, LRS Chawngthu, Zoi Pachuau leh MSa Zote te an ni a. Anni hian Runner Up trophy leh Rs. 10,000 an dawng thung.

MSL Final hi Game 3-a khelh a ni a, amaherawh chu zan hnih chiah dance battle neiin a zan thumna chu Special Performance atan Crew te hian an hmang a, an choreography hlui an duh ber an rawn perform a ni. A zan thumna hi SBI Life Mizo Little Champ Winner, Zo-Nation Junior ten an rawn hawng a, mipui lawm an hlawh hle.

MSL Season 2 ah hian Best Cheerleaders thlan nghal a ni a, hetah hian TBL Cheerleaders te chuan ṭha ber lawmman hi an dawng. Anni hi, MSL ṭantir aṭanga an Club Home apianga perform thei awm chhun an ni a, an lam thiamin, an phu hle a ni. Best Cheerleaders hian Trophy leh Rs. 5000 a keng tel bawk.