Amy Winehouse biopic chhuak dawn hnai

English singer leh songwriter, kum 2011-a kum 27 mi nia thi ta, Amy Jade Winehouse chanchin movie-a siam,'Back to Black' chu May 10 hian tihchhuah a ni dawn ta. He film-ah hian tleirawl a nih aṭanga international megastar a nih thlenga nun kawng, a thil tawn leh paltlang hrang hrangte tarlan a ni ang.

'Barbie' film leh BBC drama, Industry pawha lo inlan tawh, Marisa Abela chu Winehouse lemah hian a chang a, 2009-a John Lennon biopic 'Nowhere Boy' director Sam Taylor-Johnson chuan a direct a ni. Film an siam ṭan hmain director hian Winehouse nu leh pate pawh a tlawh vek a, a chhungte hian 'Back to Black' siamna hi an thlawp ṭha hle a, mahse, an rawn inrawlh lo tih a sawi. An film channa hmunah a nu leh pa pawh kalin, Winehouse lema chang Abela hi an va hmu a ni.