Box Office: "Godzilla x Kong: The New Empire" ngam an la awm lo

North American box office-ah "Godzilla x Kong: The New Empire" ngamtu film thar a la awm lo a, a kar hnihna atan no. 1 a hauh chhunzawm a, USD mtd 31.7 a lak luh belh leh.

MonsterVerse franchise film pangana hi beisei phak bakin tlangzarh karah a che ṭha a, no. 1 dinhmun la hauh chhunzawm mah se, a kar hnihnaah erawh entu hi 60.4% in an tlahniam. North America-ah USD mtd 135 a hmu chhuak tawh a, ram dangah USD mtd 226 hmu tawh bawkin, a sum lak luh hi USD mtd 361 a tling pha tawh. Kar hnih chhunga a sum hmuh hian a budget, USD mtd 135-150 chu a khum hneh viau tawh.

Film thar, 'Money Man' chuan USD mtd 10.1 la lutin no. 2-ah a rawn lang. He action thriller hi Dev Patel directorial debut a ni a, a tirah chuan streaming tura tih ni mah se, production company lamin Universal chu inremna siampuiin, theatre lamah tihchhuah a ni ta zawk a ni. Rotten Tomatoes-ah 86% pek niin, audience-te'n CinemaScore-ah B+ an pe bawk. "Ghostbusters: Frozen Empire" chu no. 3-ah a tla thla a, USD mtd 9 a lak luh belhin, domestic-ah USD mtd 88.9 leh overseas-ah USD mtd 49.3 a hmu chhuak tawh a ni.

'The First Omen' chuan box office lamah beisei a rawn pha chiah lo a, no. 4-ah a rawn lang. USD mtd 30 senga an siam hian North America-ah USD mtd 9.1 leh ram dangah USD mtd 17.5 a la lut a ni. Top 5 hi 'Kung Fu Panda 4' chuan kharin, USD mtd 7.8 a hmuh belh leh a, he film aṭanga an sum hmuh hi USD mtd 420.4 a tling tawh.