Indian influencer market a ṭhang chak; Kuminah USD mtd 280 a tlin chhoh rin a ni

India ramah influencer marketing industry a ṭhang chak hle a, kuminah market hlut zawng hi USD mtd 289 hu a tlin chhoh a, kum 2026-ah USD mtd 405 a tlin rin a ni.

Ernst and Young-in survey an neihna report, 'The State of Influencer Marketing in India' a tihchhuah tharah hei hi tarlangin, India rama influencer zinga 77% chu hmeichhia an ni. He report hi Collective Artists Networks-a Bing Bang Social nena thawkduna an buatsaih a ni.

Report chuan India rama influencer zingah 65% hian thla khatah USD Rs nuai 1.4 vel an hlawh pha a, heti zat hlawh pha zingah hian hmeichhia 65% an awm. Influencer zingah 77% hi kum hnih liam ta aṭang khan an sum lakluh a pung chho nasa a, hei bakah 86% chuan kum hnih lo awm leh turah an sum lakluh hi 10% vela a pun chhoh an beisei bawk.

India hian influencer marketing industry lam kan hmelhriat har a, mahse a lar chhoh hnuah brand hrang hrangten marketing strategy atan hmang chhoin, tunah hian brand zinga 75% vel chuan an bungraw vawrh larna peng pakhat atan influencer marketing hi an hmang tel tawh.

Influencer marketing a lar leh ṭhan chakna chhan pakhat hi India rama mobile phone man a tlawm vang leh, ram chhung hmun hrang hranga internet service a tlawm vang a ni. EY report chuan kum 2030-ah India ramah smartphone hmangtu hi mi mtd 740 vel tling chho turin a chhut a, mobile khawihna atana an hun hman 50% chu social media platform enna atan an hmang dawn niin a sawi bawk.