Thenfai hna thawktu 'Save the Riparian'
Aizawl khawpui tui lakna, Tlawng lui fintu kawr bawlhhlawh thenfai beihpui chu 'Save the Riparian' pawl chuan an nei mek a, vawiin hi hnatlanga an thawh chhuah ni 15-na tur a ni. An hnathawh hi ni 20 chhung awh tura ruahman ni mah se, bawlhhlawhte a lo tam em avangin a hun hi pawhsei zel an tum a, an zawh hun tur tak pawh an la sawi thei lo.
'Save the Riparian' chu eng nge?
'Riparian' hi lui dung leh a chhehvela thil awm zawng zawng, thil nung leh nung lo pawh sawina a ni. Mizoram lui dung leh a chhehvel ṭawp leh bawlhhlawh lutukte veiin, kumin February 2024 khan environment lama tui tak takte leh hma lo la tawhte kal khawm chuan 'Save the Riparian' pawl hi an din ta a ni. An hmalakna hmasa ber atan Tlawng lui fintu luikawrte tihfai thupuiah an nei a, March 26, 2024 khan Mission Vengthlang leh Model Veng inrina luikawr tihfai hnatlang neiin bul an ṭan a, he an hnathawh hi Aizawl Municipal Corporation Mayor, Lalrinenga Sailo chuan a vai liam a ni.
Management Team leh Frontline Workers
Thenfai hna an thawhnaah 'Save the Riparian' pawl hi hlawm hnih - Management Team leh Frontline Workers-ahte an inṭhen a ni. Frontline Worker-te chu luikawr dung bawlhhlawh thianfai tak taktu niin, ni tin an thawk chhuak a, Medical Team te'n an zui reng bawk. Management Team lam hian Frontline Worker-te mamawh engkim an lo buaipui ve thung.
Thenfai hna thawh a hautak
Mizorama lui hrang hrang, a bikin Aizawl khawpuiin a tlan ber, Tlawng lui hi Aizawl khawpui thli leh bawlhhlawh chi hrang hrang luan luhna a nih avangin a bawlhhlawhin a ṭawp em em a, thenfai hna thawh pawh a hautak hle. Kawr thenfainaa an bawlhhlawh chhar khawmte hi Tuiriala Solid Waster Management Center-ah an paih zel a ni. Bawlhhlawh hi pick-up trip 20 chuang an paih tawh a, bawlhhlawh chhar khawm, luikawr aṭanga la put chhuah loh a awm nual bawk.
Frontline Workers leader, Romalsawma (Roma) hian a hmain Tlawng Lui a lo zawh chhuak tawh a, heta a hmuhchhuah chu Public Health Engineering hoin tui an pump-na hmunpui chhak lawka Tlawng Lui fintu luite chuan bawlhhlawh an luan luhpui nasain, Tlawng Lui hi a ṭawp phah zual a ni. Serlui A pawh uluk takin a enfiah a, he lui ṭawp leh bawlhhlawh chhan hi mihringte vang liau liau niin, polythene chhia, thawmhnaw leh bawlhhlawh dangte a awm hner hnur a ni.
Lui hnar aṭanga a ṭawp avangin lui mawng lam thlengin a nghawng a, chu chuan luia cheng chi nungchate nasa takin a nghawng a, tam takin an thih phahin harsatna an tawh phah nasa hle. Kan tui tlan ber a nih avangin mihring hriselna atana pawi thei khawpin a ṭawp tawh.
Mipui thlawpna mamawh
'Save the Riparian' pawl chuan an hmalaknaah mipui thlawpna an mamawh tak zet tih an sawi. Hnatlanga an thawh chhuahnaah hian pawl leh mimal anga puitu pawh an nei fo a, hemi rual hian thawk chhuak thei lote tan pawh kawng dangin an puih theih a ni. 'Hnatlangte thingpui in man, bawlhhlawh paihna tur motor hire-na man' tia sum thawh an awm fo a, awm hmun aṭanga lo pui duh tan 9856880027-ah Gpay hmangin a lo hnatlan ve theih a ni.
An hnathawhnaa tha leh zung sengtu, sum leh pai hmanga ṭanpuina petute chungah 'Save the Riparian' chuan lawmthu an sawi a, he hnathawh sponsor-tu AMC, PHE leh UD&PA Department te chungah an lawm hle. An hnathawh tawhna zawng zawng hi en duh tan Roma Hmar (Youtube) channel-ah zan tin an dah a, dah chhunzawm zel pawh an tum.