Aprilia RS 457-in ngaihven a hlawh

India ramah a vawi khat nan Aprilia bike tihchhuah a ni a, Ningani zan khan CK Cars showroom Bawngkawn, Aizawlah tlangzarh a ni.

Dealer Principal Joseph Lalchhanhima leh Info Bikes hotupa Vanlalmuana'n khuh hawngin Mizoramah Rs. 4,69,709-in hralh a ni a, mi pahnihin lei nghalin Mizo rider hriat hlawh Lalawmpuia'n a lei hmasa ber a ni. Rawng chi hrang pathum awmin petrol litre 13 thun theih, engine len zawng cc 457 a ni.

India ramah Aprilia-in scooter chiah a hralh chhuak ṭhin a, RS 457 hi India-ah siamin India rama bike an hralh chhuah hmasak ber a ni nghal bawk. Mizoramah pali rawn thlengin demo tur leh khalh chhin duhte hman tur dah hran a nih bakah a dang an hralh chhuak nghal ve ve a; khalh chhin duh tan intiamkamna telin Aprilia showroom aṭangin a khalh chhin theih.

MotoGP bike an siam dan angin, wire hmangin engine thunun a nih bakah power, torque leh traction control atan mode chi thum - sport, road leh rain a awm. Heng mode hrangte hi duh dan ang zela hman theih a nih rualin ṭul ti lo tan off mai theih a ni.