Cinema for Gaza-in lilamna aṭangin USD 315,000 hmu chhuak

UK-a hmeichhe filmmaker leh film journalist ṭhenkhatin pawl an din, Cinema for Gaza chuan indona thleng mekna, Gaza Strip-a civil mite damdawi lama chhawmdawlna turin lilamna aṭangin USD 315,000 chuang an hmu chhuak.

Celebrity auction hi UK-based charity, Medical Aid for Palestinians (MAP) tan an buatsaih a, he pawl hian Gaza Strip-a harsatna tawkte tan damdawi lam enkawlna an pek bakah, tui thianghlim leh cancer damdawi thlengin an pe a ni. Indo meknaah MAP chauh hi Gaza hmar lama langsar taka chhawmdawlna hna thawktu NGO awm chhun a ni rih a ni.

Lilamna atan hian celebrity eng emaw zatin an thil neihte an thawh a, heng zingah hian signed film poster leh an mimal thilte pawh a tel. Hengte hi April 2 aṭang khan lilam ṭanin, April 12 zanlaiah an zo a ni. Lilamnaa an hralh to ber chu Annie Lennox-i'n a hit, 'Sweet Dreams' hla thu, a kutziak ngeia a ziahna lehkha chu niin, USD 26,222-in an hralh. Lilam tura thawh khawm zingah hian Jaoquin Phoenix-a'n a hming a sign-na, 'Joker' poster te, Emma Corrin hnen aṭanga singed 'The Crown' script te an tel. Fund-raiser co-organiser, London film journalist leh critic Hanna Flint chuan an beisei phak baka sum an hmuh thu sawiin, an pawlah chuan Juda, Muslim, Kristian leh atheist thlengin an awm vek a, ṭanpui hna thawktute an theih anga lo puih vena tura hma lak chu an duh tlang vek tih a sawi. Hemi atan hian cinema chu hmanraw pawimawh tak a ni thei a ni, a ti.

Cinema for Gaza chuan civil mite chhawmdawlna turin sum tuak chhoh zel an la tum tih an sawi.