Babymonster 'Sheesh'-in ni 10-ah view mtd 100 nei

Korean girl group, Babymonster-in April 1-a an tihchhuah, 'Sheesh' music video chuan ni 10 leh darkar 11 hnu, an ram huna April 11 chawhma dar 11:35 khan view maktaduai 100 a nei tling der.

'Sheesh' hma hian member pasarih awmna, Babymonster chuan an hla dang, 'Batter Up' chu ni 18 chhungin view mtd 100 hi an lo neih tlinpui hman bawk a, YouTube lamah K-pop girl group debut music video zinga view mtd 100 nei rang ber an ni. Babymonster hian music video hi pathum chauh an la nei a, an vai hian 100 million view an neihpui vek a ni. 'Stuck in the Middle' chuan ni 38 hnuah 100 million view hi a lo nei ve tawh bawk. He group hi YG Entertainment-in reality program, Last Evaluation kaltlanga a din a ni a, member-te hi Ruka, Pharita, Asa, Ahyeon, Rami, Rora, leh Chiquita te an ni. May thla hian ram panga - Singapore, Japan, Thailand, Taiwan leh Indonesia-ahte fan meeting neih an tum.