TikTok-ah Taylor Swift hla dah let leh

Universal Music Group (UMG) leh TikTok-in license leh royalty chungchanga buaina an neih avanga February thla tawp lama TikTok aṭanga artist eng emaw zat hla lak thlak a nih hnuah, Taylor Swift hla bik chu dah let leh a ni ta a, video siamna atan pawh a hman leh theih ta.

Taylor Swift hian kum 2019 aṭang khan a hla publishing rights hi a nei a, hei vang hian TikTok nen hian a hrana inbiain inremna hi an siam nia rin a ni. UMG leh TikTok buaina avanga hla lak thlak zingah hian Swift bakah,Drake leh Lady Gaga te hla pawh a tel. Swift hian April 19 hian a studio album 11-na, 'The Tortured Poets Department' a tlangzarh dawn a, a album cover leh song title-te pawh a lo tarlang tawh a ni. TikTok nen inremna an siam leh tak avangin, he album-a hlate pawh TikTok video siamna atan an hman chhoh leh nasat hle a rinawm.