Beyonce a chungnung Prince erawh a ropui thung

Billboard album chart lamah chuan Beyonce chuan tuma dan rual lohin pakhatna a hauh a, Prince thung chu chungnung ber lo mah se a ropui thung; top 7-ah a album panga zet a lang thei!

Beyonce album thar ber 'Lemonade' chu tuma dan rual lohin pakhatnaah a awm a, kar liam ta khan copy 653,000 zet a hralh a, top 10-a lang dangte album hralh zawng zawng zat belhkhawm aiin Beyonce hian a hralh hnem. Copy 485,000 chu album pangngai a ni a, a bak chu album tlukpui a ni. Beyonce hi a turu hle a, Billboard album chart-a pakhatna hauh thei album paruk a neihna a ni ta. Kum 2003 khan 'Dangerously in Love' hmangin pakhatna a rawn luah ṭan a, chumi hnuah kum 2006 khan B'Day khan pakhatna a rawn luah leh a, kum 2008-ah 'I Am...Sasha Fierce' hmangin pakhatnaah a awm a, kum 2011-a '4' pawh kha pakhatna a ni a, kum 2013 khan 'Beyonce' a rawn tichhuak a, kha pawh pakhatnaah bawk a awm leh. Beyonce chauh hi album a tihchhuah a, a hralh chhuah kara pakhatna luah nghal zel thei album paruk nei awm chhun a la ni.

Prince hi a thih hnuah khawvelin a ropuina a hre chhuak ve chauh a ni ngei ang, a album pawh top 10-ah a rawn lang phuk phuk mai! Tunah hian Prince album panga lai mai Billboard album chart-ah hian a lang. 'The Very Best of Prince' chu pahnihna a ni a, 'Purple Rain' chu pathumna, 'The Hits/The B-Sides' chu palina, 'Ultimate' chu parukna leh '1999' chu pasarihnaah an lang. 'The Very Best of Prince' hi kar liam ta khan copy 391,000 lai hralh a ni a, 'Purple Rain' hi copy 150,000 zet an hralh bawk.

A mihring ang chuan top 10-ah hian mi paruk chauh an lang a, Beyonce leh Prince bakah hian Rihanna, A$AP Ferg, Chris Stapleton leh Justin Bieber te hi midang lang ve an ni.

Billboard album chart

"Lemonade" - Beyonce Knowles (653,000)

"The Very Best of Prince" - Prince (391,000)

"Purple Rain" - Prince (150,000)

"The Hits/The B-Sides" - Prince (106,000)

"Anti" - Rihanna (50,000)

"Ultimate" - Prince (40,000)

"1999" - Prince (36,000)

"Always Strive and Prosper" - A$AP Ferg (35,000)

"Traveller" - Chris Stapleton (33,000)

"Purpose" - Justin Bieber (31,000)