Music hmanga sum lalut hnem Daduhi

Tunlai Mizorama rimawi lam zaithiamte album hralh aṭanga chhut chuan tunhma, kan changkan hma (?), cassette album siam a nih laia an album hralh kha chu turu tak a ni. Khatiang hunlaia zaithiamte zingah Daduhi Khiangte hi sum lalut hnem berte zinga ngaih leh sawi a ni ṭhin a, Vanglaini chuan kan k‚wm chiang a, sum a lo lalut hnem narawh e!

Daduhi hian album pasarih vel lai a tichhuak hman a, digital-a kan kai hnu thlengin Zo rimawi khawvelah chuan a hming leh a zai kan ngaihthla hman. Pasal a neih hnuah, England lama an khawska tak avangin a hla thar kan hre tam ta lo a, tunhnai khan C. Sanga nena an zai dunna, 'A zual zel si' tih chu music video an siam a, an tichhuak a, beisei a sang hle.

Mi ṭhenkhat chuan Daduhi'n album a tihchhuah niin copy sang khatte chu a hralh zo nghal angin an sawi a, mahse an lo la sawi uar lo mah mah zawk a ni. Daduhi chuan, "Pathian zarah a hun lai chuan album ka tihchhuah vete min ngaihhlutsaktu an
ṭhahnem a, ka lawm hle a ni. Kan release niin sing khatte hi chu ka hnen
aṭangin a chhuak vek zel," a ti. Insawi thei leh insawi eng emaw vel nih a hlau hle a, amah hian a sawi uar duh lo zawk. A release ni hian agent hrang hrangten an inchuh zo nghal deuh zel a ni.

Album a hralh chhuah aṭanga a sum lakluh zat erawh a sawi ṭha duh lo, cheng maktaduai khatte chu a hmuh tlin a rinawm nain, 'Maktaduai te chu ni Ím Ím lo' tiin Daduhi hian a sawi. A sawi duh chin a tam lo a, a sawi chhun erawh, 'Lungdumtu album ka release tuk khan bank-ah cheng nuai thum chu ka dah' a ti; a rinawm, album a hralhna aṭangin car a lei thei a, a hunlai chuan a turu viau a ni. Lungdumtu album a hralh tukah cheng nuai thum bank-ah a dah thei a, a hnu zelah pawh he album hi hralh belh zel a ni. Lungdumtu hi a album hralh hnem ber a la ni lo zui. Daduhi'n album mala a hralh hnem ber chu 'Hrilh ka hai ngei' tih kha a ni. He album hi video pawh siam loin, audio-in tihchhuah a ni a, copy sing thum vel zet a hralh zo.

'Lungdumtu' album hi a pasal, Hruaitea puala a siam niin an sawi deuh ṭhin a, hemi chungchanga hi Daduhi chuan a sawi tam duh lo a, a nui ringawt a, an sawi hi dawt hlang chu a ni bik kher lo ang.

Daduhi hian music khawvel chawlhsan mai a tum lo a, tunah hian Gospel album tur a buatsaih leh mek. Tunlaia album hralh a harsat tawhzia pawh a ral hriat ve a, pawi a ti hle. Album a siam leh a nih bawkin hloh pawh pawi ti loa siam a tum a ni.