Billboard 200: US mipuite'n Spanish hla an ngaithla nasa ber

Billboard 200 chart-ah Bad Bunny album thar 'El Ultimo Tour del Mundo' chu pakhatna a ni a, Miley Cyrus leh BTS-te pawhin Puerto Rican rapper Bad Bunny hi an  khum zo lo a ni.

El Último Tour Del Mundo hi Bad Bunny studio album pathumna niin album hrim hrim a tlangzarh palina a ni a, a album hming hi Spanish ṭawng niin 'The Last Tour of the World' tihna a ni a, tunhnaia US mipuite'n an album ngaihthlak tam ber chu he album hi a ni.

Bad Bunny al­bum thara hlate hi Spanish hla vek a ni a, English hla a awm lo. Heti chung hian Billboard 200 chart-ah No.1 a ni thei a, tuilet hnua Billboard 200 chart-a Spanish hla hlang awmna album-in No.1 a nih ṭum khatna a ni. Tunhmain hetiang thil hi a la thleng ngai lo. 

Thla kua vel liam ta lawk khan Bad Bunny hian YHLQMDLG album a lo tlangzarh tawh a, hei hi Spanish hla hlang awmna album Billboard 200-a che ṭha ber record lo siam tawhtu niin Bad Bunny hian ama record siam vek hi a khum leh ta a ni.

Bad Bunny hian El Último Tour Del Mundo hmang hian equivalent album units 116,000 a hmu chhuak a, Billboard chart-ah hian ṭum li ngawt top 10-ah a lang ta a, US mipuite'n  Puerto Rican rapper/singer hi an ngaina takzet tih a lang chiang hle.

Bad Bunny hrim hrim hian record a nei ṭha hle a, kumin  Super Bowl LIV halftime show-ah khan Shakira leh J.Lo-te kiangah khan a perform tawh a; Latin urban music artist Rolling Stone magazine cover-a lang thei hmasa ber a ni bawk.

Miley Cyrus chuan November 27 khan album thar Plastic Hearts a tlangzarh a, Billboard 200 chart-ah pahnihna a ni. 'Plastic Hearts' hi Miley studio album pasarihna a ni a, track pangngai 12 a awm a ni. Milar tak takin he album-ah hian an thawhpui a, Dua Lipa, Billy Idol leh Joan Jett-te pawh chung zingah chuan telin Rolling Stone    The Best Albums of 2020-ah 23-na a ni nghal. He album-a hla pahnih Midnight Sky leh Dua Lipa a thawhpuina 'Prisoner' chu album a tlangzarh hma hian single-in a tichhuak tawh a ni.

BTS pathumna an ni

Kar hmasa lamah kha chuan BTS album thar ber 'BE' hi pakhatna ni mah se chart thar berah erawh Miley leh Bad Bunny-te hi an ngam ta lo a ni.

Ariana Grande 'Positions' chu palina a ni a, Pop Smoke "Shoot For The Stars Aim For The Moon' chu Top 5-ah a la inham tang bawk.