Canada budget-ah Taylor Swift concert ticket chungchang tel

Canada sorkar chuan Thawhlehni khan 2024 budget a pharh a, budget-a an policy thar an tarlan zingah Anti-Hero singer, Taylor Swift concert ticket a man dik taka an lei theihna tura hma lak an tumna tarlan tel a ni.

Budget pharhtu, finance minister Chrystia Freeland chuan ṭhalai zingah Swift concert ticket, man to tak taka lo zuar chhawng chungchang sawi langin, hetianga dik lo taka ticket zuar chhawngte dap chhuah a, a man dik taka ticket lei a nih theihna tura hma an lak tur thu a sawi. Swift 'Eras Tour' neih mekah hian ticket inchan loh avanga man to tak taka ticket lei chhawng leh, mi bumna remchanga hmang an tam a, kumin kum tir lam khan Vancouver Island chuan Swifties-te chu ticket chungchanga inbumna awm ṭhin laka fimkhur turin a lo chah bawk.