Leverkusen-in an duhtawk lo

Bayer Leverkusen chuan kartawp inkhelah khan Bundesliga nomawi an chawi a, league match nga khelh tur la awmah an champion der. Mahse, German club hian league-ah ringawt duhtawk mai an tum lo - Europa League leh German Cup a la awm.

Xabi Alonso enkawl team hian German Cup-ah final an lut tawh a, Europa League quarterfinal first leg-ah West Ham chu 2-0 in an hneh bawk - zanin dar 12:30 hian second leg khel turin Hammers hi an mikhual dawn.

Bundesliga nomawi an chawi zawh khan Alonso chuan, "Hetah hian tawp mai kan duh lo a, kan hmaah hlawhchhuah duh tam tak kan la nei a ni," a ti a, league nomawi nen chauha season khar a tum lo.

Mahse, Leverkusen tan hahdam taka awm ngawt a fuh chuang lo a, David Moyes enkawl Hammers hi English club vantlang tak an nih avangin an mualah ngat phei chuan hneh an awlsam dawn lo.

West Ham hian Moyes-a hoin season hmasa khan Europa Conference League nomawi an chawi a, nipui transfer-ah Declan Rice chân zui mah se, Mohammed Kudus, Edson Alvarez leh James Ward-Prowse te ho an la lut ve thung.

Hammers hi Premier League table-ah pariatna an ni mek bawk a, Moyes-a'n hna a thawk chhe lo. Heti chung hian Scottish coach duh lohna fans leh West Ham thuneitu lamah a ri reng a, amah berin contract an zawrh thu sawi mah se, Hammers thuneitu ṭhenkhat chuan season tawp ruala chhuak turin an duh niin an sawi.

Manchester United boss hlui tan amah seltute chhanletna hun ṭha a ni a, Leverkusen lakah a team a 'comeback' pui a, Europa League semifinal an lut a nih ngat chuan Moyes-a'n a fak a hlawh dawn - hmabak erawh a awlsam lo ang.

Hammers tan hrem vangin midfielder thiam bik Lucas Paqueta leh left back Emerson Palmieri te chu hrem vangin an inlan thei dawn lo a, a hun lo hle! Leverkusen-in harsatna an nei lo a, striker Adam Hlozek chu hliam vangin chawl mek mah se an mamawh lo - Victor Boniface leh Patrik Schick an nei.

Kum 23 mi Boniface hi tun season an chet ṭhat theih nana player pawimawh a ni a, inelna hrang hrangah match 27 khela goal 18 khungin, assist vawi 10 a nei a, Schick hian match 24-ah goal 11 khungin, assist vawi thum a nei.