Leicester champion fan-ten hlawkpui

Premier League-ah beisei kai lo ber pawl Leicester City an cham≠pion a, Foxes champion hlawkpui≠tu zingah an fan-te an langsar hle! Season ṭan hmain sum inthapna lamah Leicester champion ring an tlem a, fans ruhkawl zualten an vanneih phah thung.

Sum inthapna lam firm Coral neitu Simon Clare chuan, "Kum 1961-a sum thapna lam sumdawnna phal a nih hnuah Leicester City champion ang em em a sum thapna sumdawnna neituten sum an hloh hi a la nasa ngai lo," tiin a sawi.

Foxes-in Premier League nomawi an chawi avanga sum inthapna lam sumdawnna England rama kalpuituten sum an hloh tur zat ringawt hi pound maktaduai 20 bawr vel nia chhut a ni a, a tam tham hle.

Leicester fan rinawm Levi Taylor chuan season ṭan dawna inthapna lama a sum dah zarzoin £26,000 (Rs. 25,07,711) a dawng a, car leh in a lei bakah a bialnu chawlh a hmanpui tur thu a sawi!

Foxes fan ruhkawl pakhat Keval Nakesheree chuan Levi ai hian a la hlawh hnem hret a, Premier League-a a club ṭan an champion zarah £33,000 (Rs.31,82,864) a hlawh dawn!

Keval hi Leicester fan ṭhenkhat aiin a inringtawk a, Leicester City an champion hma khan a club ṭan hi an champion ngei a rin miau avangin a sum dawn tur hisapin Florida-ah chawlhna tur a lo book lawk diam tawh!

Sum inthapna firm Ladbrokes chuan Keval ang em em a fan inringtawk hi an la hmuh ngai loh thu an sawi! Nakesheree chuan, "March thla a nih kha chuan fans tam takin an sum dah la letin an hlawkna turte a tlem zawkin an la a, kei chuan ka chawlh hmanna tur ka book thung," tiin a intithei hle.

Hetihlai hian a sum lam zawng niloin Leicester City fan ruhkawl Lee Chapman chu striker Jamie Vardy nen an inan em avangin a vannei thung!

Lee Chapman chuan, "Stadium pana ka kal laiin team bus aṭangin Claudio Ranieri-a'n min rawn pawt thut a, bus kawngkhar hawngin tlarhnungah min hruai a, Vardy nen thla min lak tir a, player-te chu an au nasa hle. Dak pu ve mai ka ni a, tunah chuan Tv channel hrang hrangah ka lang a ni," tiin nuam a ti hle.