An chhungkuaa mi vannei Gigi Hadid

Hmanlai chuan nupui pasal an inzawn dawnin natna benvawn nei an nih leh nih lohte an inen ṭhin a, hetiang aṭanga thlir chuan Gigi Hadid te chhungkua hi Mizote chuan mo atana kan duh loh tur chi an ni ang; an chhungkaw buaina lian tak chu Lyme disease hi a ni.

Lyme natna hi bacteria chi khatin a thlen a ni a, saphihrik kan tih ang chi hian a pu darh thei bawk. He natna vei enkawl ṭhat lohte chuan an hmai pangkhing an tiche hlei thei lo ṭhin a, an vunah thil sen val bial a awm a, a thak hle ṭhin bawk. Ruhchuktuah te a na thei a, lu na te an nei ṭhin. Hetiang natna hian an chhungkua a tibuai hle a, a nu Yolanda Foster chu hetiang natna nei hi a ni a, a laizawn, Bella Hadid pawhin a nei a, a nuṭa Anwar pawhin a nei bawk a, vanneihthlak takin amah Gigi hian a nei lo hlauh.

Hetiang harsatna hian an chhungkua tuam mah se an vanneihna lam chu an hmel-
ṭhatna leh pianthiam hi a ni. A nu, Yolanda Foster hi Dutch model a ni a, kan hriat angin Bella pawh model bawk a ni. Gigi vanneihna em em chu a naupanlai aṭanga a nih chak ber ṭhin chu Victoria's Secret Angel nih a ni a, tunah chuan a nih chak ber a ni ta a, a nuam ngawt ang. Gigi hi kum hnih mi lek a nih aṭangin model-a hman a ni chho tawh a ni.

Kendall Jenner hian an inkawmngeih hlein kan hria a, mahse kan rin aiin Gigi leh Kendall te hi an inhnaih, inlaichinna kawngah pawh. Gigi pahrawn, David Foster nupui ṭhin chu Linda Thompson a ni a, Linda Thompson hi Kendall Jenner pa, Bruce Jenner nupui ṭhin a ni.

Kum 17 mi a nihin high school zoin, a graduate a, hemi hnu hian New York-ah criminal psychology zir a chak hle ṭhin a, mahse modelling lamah a lut ta thung a ni. Gigi tiin hre mah ila, a hming dik tak, a lai ah hming chu Jelena Noura Hadid a ni a, a pa hi Muslim a ni.