Beisei angin Birds of Prey a thlawk sang lo
Birds of Prey (and the Fantabulous Emancipation of One Harley Quinn) chu Zirtawpni liam ta khan theatre-a chhuah turin tlangzarh a ni ta a, a sum hmuhchhuah zat erawhin beisei a pha lo hle. Hetihlai hian Box Office-ah chuan sum hmu-hnem ber a ni tho a, Bad Boys for Life a nekchhuak a ni. Bad Boys for Life hi sum lalut tam ber dawttu a la ni phak tho a, 1917 chu pathumnaah a la awm ve bawk.
Beisei anga thlawk
sang zo lo Birds of Prey
Tlangzarh a nih hma hauh aṭangin boruak a nei lian a, Margot Robbie ngei pawhin mipui beisei a pha dawn tih a sawi hial. Chuti chung chuan kar tawp liam taah khan US-a theatre 4,236 aṭangin $33,010,017 a lalut a, hei hian beisei a pha lo hle. A nekchhuah tak Bad Boys for Life-in a kar hnihnaa a sum lakluh pawh a phak lo a ni.
Box Office aṭanga film siamtute sum hmuhdan tarlang ṭhintu Box Office Mojo phei chuan, "Review ṭha leh entute faknain Birds of Prey chu a thlawh santir zo lo," tiin a tarlang hial.
Suicide Squad spin off Birds of Prey (and the Fantabulous Emancipation of One Harley Quinn) siamna budget hi $mtd 82-100 vel nia tarlan a ni a, US aṭanga a sum hmuhchhuah ringawt hi chuan a la pha lo hle. Khawvel puma a sum lakluh tawh zat chu $mtd 84.5 a ni thung.
Bad Boys leh 1917 bawk
Box Office chart-a Birds of Prey a rawn thlawh luh tak avang hian Bad Boys for Life leh 1917-te chuan an dinhmun an sawn hnung hret a ngaih phah ta thung.
Bad Boys for Life hi January 17-a tlangzarh daih tawh kha ni mah se $12,011,355 a la lalut thei a, khawvel puma a sum lakluh chu $mtd 336.3 a tling der tawh. Khawvelin Will Smith leh Martin Lawrence che tla an la en kham thei lo niin a lang.
Oscar-a award pathum lai hum haw thei 1917 chu pathumnaah a hnungtawlh ve hret bawk a ni.
Film thar ṭha a chhuak khat
Hollywood lam khuan kar eng emaw zat chu film ṭha thar an tichhuak ta lo niin a lang. Birds of Prey tih loh hi chu Top 10-a rawn inrawlh phak an awm lo. Chumai chu a ni lo a, Top 50-ah pawh film thar pathum chiah a lang thei a ni.
Chart hmasaa pathumna Dolittle chu palinaah a awm ve ta thung a, Jumanji: The Next Level chu a dinhmun ngaiah dingin panganaah bawk a awm.