Billboard 200: 'Cowboy Carter' a la chungnung zel

Country music lam a luhchilh avanga country artist ṭhenkhat selna a dawng chungin, Beyonce chuan a country album, 'Cowboy Carter' chu Billboard album chart lamah a la chet ṭhatpui zel a, a zawnin kar hnih no. 1 a nihpui ta.

March 29-a tlangzarh, 'Cowboy Carter' album hian kar liam ta khan US-ah equivalent album unit 125,000 nei lehin, album-a hla 22-te hian on-demand official stream mtd 132.69 an nei a, traditional album sale 20,500 a awm bawk.

No. 2-ah J Cole album thar, 'Might Delete Later' langin, equivalent album unit 115,000 a nei. Tomorrow X Together 'Minisode 3 : Tomorrow' chuan equivalent album unit 107,500 neiin no. 3-ah a lang bawk. Future leh Metro Boomin thawh dunna, 'We Don't Trust You' chu no. 2 aṭangin no. 4-ah a tla thla a, Morgan Wallen 'One Thing at a Time' pawh no. 3 aṭangin no. 5-ah a tla thla ve bawk.

Benson Boone full-length studio album hmasa ber, 'Fireworks & Rollerblades' chu no. 6-ah a rawn lang a, ani bakah Ariana Grande, Noah Kahan, Olivia Rodrigo leh SZA-te album chu Top 10-ah an lang bawk a ni.