Lersia Play-ah movie release rûnpui

Lersia Play hian April leh May thla chhungin producer/director experience nei ṭha takte siam movie chhuah tur an nei. Zaninah 'Tualsumsu' tihchhuah a nih bakah, April 26-ah 'Dâk Pu', May 3-ah 'Keimah Thingtlang Nula', May 9-ah 'Zu Zuar Fanu', May 11-ah 'Kan Chhungkua' leh May 17-ah '1999 (BISP)' te tihchhuah a ni ang.

Lersia Play hian Mizo film industry a lo changtlun zawk nan hma a la a, movie app chauh ni loin movie siamna turin filmmaker-te hnenah funding a pe ṭhin a, a pek chhuah hi Rs. nuai 80 a tling tawh. Mipuite'n mahni in lum aṭanga movie an lo en theihna ṭangkai tak a nih laiin, piracy avangin harsatna an tawk fo a, pirated movie lo thehdarhtute hi chhui chhuah thuai a, hrem an nih theih nan hma an la reng a ni. Piracy lama himna tur pawhin theihtawp an chhuah a, screen record chu a theih anga block a ni a, block theih loh a awm palh takin tiin, movie play lai hian a entute ID screen-ah a lang a, lo record ṭhinte chu rang taka man chhuah an ni thei tawh dawn a ni.