Password sharing tawp hnuah Netflix sum lak luh a pung

Streaming service lian, Netflix chuan password inhman ṭawm theihna an tihtawp hnuah, an sum lak luh a pung chho hle tih an sawi.

Netflix hian kumin January-March thla chhungin subscriber maktaduai 9.3 an neih belh a, hengte nen hian subscriber hi mtd. 270 dawn an nei tling tawh. Thla thum chhunga an hlep pawh hi USD tld 2.3 a tling. Kum hmasa lam aiin first quarter chhunga an sum lak luh hi 15% dawnin a sang tawh a ni. Second quarter-ah an sales ṭhanna tur hi 16% vel ni tura chhut a ni bawk.

Ningania report an tihchhuah rual hian, Netflix chuan kum 2025 aṭang chuan quarterly-a subscriber an neih zat an report ṭhin hi an titawp dawn tih an sawi bawk. Company executive-te chuan tunah chuan customer hui luh lamah ṭan lak vak aiin, revenue leh operating lam chu hmasawnna tura pawimawh a ni tawh tih an sawi. Netflix hian kum hnih liam ta khan subscriber maktaduai khat vel an hloh thu an puang a, hemi hnu hian investor-te chuan subscriber lama insawrbing vak aiin, an hlawkna tur lam ngaih pawimawh a ngai zawk niin an lo sawi tawh a ni. Hemi rual hian Netflix share hi tlakhniam laite a awm fo a, active subscriber an neih zatte an puanzar tawh loh chuan investor lam tan a buaithlak ve thei dawn thung a ni.

Netflix hian tech giant - Meta Facebook bakah Elon Musk-a'n a lei tak, X (Twitter tih ṭhin) te chuan thla tina active user pun chhoh dan an report ṭhin chu an lo titawp ve tawh bawk.

Netflix hian kuminah a khât tawkin hit a nei chho reng a, heng zingah hian series 'Fool Me Once' leh 'Griselda' te, drama - The Gentleman leh 3 Body Problem bakah reality show Love is Blind-te a tel.