'The Tortured Poets Department' in record hrang hrang a siam nghal

Pop superstar, Taylor Swift album thar, "The Tortured Poets Department" chuan rin lawk ang ngeiin rimawi khawvelah record hrang hrang a siam chho nghal.

April 19-a tlangzarh, ''The Tortured Poets Department" hi che ṭha hle tura beisei a ni sa a, mahse, an beisei phak bakin a la che ṭha zawk a ni, rimawi khawvel boruak a sawi nghing hle. Tlangzarh ni hian US-ah album hi copy maktaduai 14 hralh chhuah nghal a ni a, Swift-i album zingah tlangzarh nia US-a hralh chhuah tam ber a rawn ni nghal.

Spotify-ah pawh "The Tortured Poets Department" hian a ni khat ni hian stream maktaduai 300 chuang a nei nghal a, Swift-i album zingah hetiang dinhmun thleng thei hmasa ber a ni. Streaming platform dangte chhiar telin, he album hian a ni khat nia stream a neih hi mtd 552.2 a tling der. Apple Music leh Amazon Music-ah tlangzarh nia stream ngah ber record a siam bawk a ni. Album tlangzarh hma ni hian Spotify-ah vek pre-save record tam ber a lo siam tawh bawk.

Sales leh streaming chart lamah a chet ṭhat chhoh zel avangin, Billboard 200 album chart-ah pawh no. 1 a rawn nih ngei rin a ni. Hei hi a thleng dik a nih chuan Swift hian hmeichhe artist zingah no. 1 album nei ngah ber record a rawn siam leh dawn bawk a ni.

April 19 khan Taylor Swift chuan "The Tortured Poets Department" album hi a tichhuak a, a hnu rei loteah bonus track ho tichhuak leh nghalin, track 31 a awm.