Joseph Zaihmingthanga tribute concert buatsaih dawn

Joseph Zaihmingthanga Memorial Society (JMS) chuan Mizo zaithiam lar, kum 2023, May 7-a boral, Joseph Zaihmingthanga pualin tribute concert an buatsaih dawn. He concert-a sum hmuh hi de-addiction centre hrang hrang - TNT, TBCC & OKM ṭanpuina atan hlan a ni ang.

Tribute concert hi May 8, 2024 hian Vanapa Hall-ah neih tum a ni a, Mizo zaithiam lar tak takte an inlan dawn. Zaithiam inlan turte hi Gospel lam aṭangin Vanlalsailova, Zorema Khiangte, Jonathan Lianhna, Thawhlehnaniropuia, Zoramchhani, Rinhlui Tlumang, Lawmi Khiangte leh, Lengzem aṭangin H.Lalrempuia, Vanlalhmangaiha, Pc.Lalremruata, Lalchhandama, Zaii Hauchhum, Jaui, Lilac & Isac te an ni. Joseph-a hla leh anmahni hla hit-te an sa ang.

Joseph Zaia hi zaithiam a nih bakah hlaphuah thiam leh lam thiam a ni a, IMFA-ah music leh zai a zir chhuak a ni. Kum 2003-ah a album hmasa ber,'Tah chuan a leng' siamin, Rimawi Khawvel magazine editor-in a produce-sak a ni. Hetih hun lai hi Vanlalsailova lar vanglai a ni a, a producer nen pawh hian an ṭang hle a, Mizoram khawpui hrang hrangah album promotional tour-te an nei. Pathiana piantharna a chan hnuah fak hla lam sain, hla ṭha tak tak a phuah a, hit pawh a nei leh nual a ni. Zai bakah thu hmanga rawngbawlna nei bawkin, ruihhlo ti ṭhin home-a enkawl ngaite a vei em em a, an tan theihtawp a chhuah ṭhin. Hei vang hian tribute concert hi a sulhnu chhuina ni pah fawmin ruihhlo ngaite enkawlna home ṭanpui nan tih a ni.